އޮލިމްޕަހުގައި މިހާރު ދައްކަމުން އަންނަ ފިލްމު "ބިބީ" ގެ ވަދާއީ ޝޯ މާދަމާ ރޭ ބާއްވަން ތައްތާރުވެއްޖެ އެވެ.
އާންމުންގެ ފަރާތުން ބޮޑު ތަރުހީބެއް ލިބުނު ޑާކް ރެއިން އެންޓައިންމަންޓްގެ މި ފިލްމު ޕްރީމިއާކުރީ މި މަހުގެ 7 ވަނަ ދުވަހުގެ ރޭގަ އެވެ.
އެ ސްޓޫޑިއޯގެ މި ފުރަތަމަ ހޮރޯ-ކޮމެޑީ "ބިބީ" އަކީ އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ، ޑައިރެކްޓްކުރި ފުރަތަމަ ފީޗާ ފިލްމެވެ. އޭނަ އަކީ ފިލްމުގެ ލީޑް ބަތަލު ޝަރަފް އަބްދުﷲގެ އަންހެނުންނެވެ.
"ބިބީ" ގެ ބަތަލާ އަކީ ޑާކް ރެއިންގެ ގިނަ ފިލްމުތަކަކުން ފެނިފައިވާ މަރިޔަމް މަޖުޖާ (މަޖޫ) އެވެ.
މީގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު ޝާއްކޮ (އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.
އޮލިމްޕަގައި މާދަމާ ރޭ "ބިބީ" ގެ ފަހު ޝޯ ދައްކަން ހަމަޖެހިފައިވާ އިރު، ރޭ މި ފިލްމު ތިނަދޫގައި ދައްކާފައިވެ އެވެ. މިއީ ފިލްމު ދައްކަން ފެށި ފަހުން އަތޮޅުތެރޭގެ ރަށެއްގައި ފިލްމު ދެއްކި ފުރަތަމަ ފަހަރެވެ. އަދި އިތުރު ރަށްތަކެއްގައި ވެސް ފިލްމު އަޅުވަން ތާވަލުކޮށްފައިވެ އެވެ.
"ބިބީ" އަކީ ޑާކް ރެއިނުން މި އަހަރު ގެނެސްދިން ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި ގެނެސްދިން ރިވެންޖް އެކްޝަން ތުރިލާ "ފުރޭތަ" އެވެ.
އޮލިމްޕަހަށް ދެން އަންނަން އޮތް ފިލްމަކީ ތަޖުރިބާކާރު ކެމެރާމަން ހަސަން ހަލީމް (ކޮކޯ) ޑައިރެކްޓްކުރި ފުރަތަމަ ފީޗާ ފިލްމު "ގެއްލުނު ރޭ" އެވެ. މި މަހުގެ 29 ވަނަ ދުވަހުގެ ރޭ ޕްރީމިއާކުރާ އެ ފިލްމުގެ ޓިކެޓް އޮލިމްޕަހުން މިހާރު އަންނަނީ ވިއްކަމުންނެވެ.