ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް މަސްވެރިކަން ކުރި ބޭރުގެ ބޯޓެއް ދައުލަތަށް ނަގައި އަދި އެ އުޅަނދުގެ ވެރިފަރާތުގެ މައްޗަށް ކޮށްފައިވާ 400،00ރ. ގެ ޖޫރިމަނާ ދެއްކުމަށް ސިވިލް ކޯޓުން ހުކުމްކޮށްފި އެވެ.
އަވައްޓެރި ސްރީ ލަންކާގެ "ޕުޝްޕާ ކުމަރަ" ކިޔާ ބޯޓުން ރާއްޖޭގެ ކަނޑުގެ ސަރަހައްދުގައި މަސްވެރިކަން ކޮށްފައިވާތީ އެ އުޅަނދުގެ ވެރިފަރާތް ކަމަށްވާ ތަމަންތާ ރުކުމަލް ޕެރޭރާ ޖޫރިމަނާކޮށްފައި ވަނީ 400،000ރ. އިންނެވެ
އެ މައްސަލާގައި ތަމަންތާގެ ޣައިރު ހާޒިރުގައި އެ ކޯޓުން މިދިޔަ ބުދަ ދުވަހު ކޮށްފައިވާ ހުކުމުގައިވާ ގޮތުން ވަނީ އޭނަގެ މައްޗަށް ފިޝަރީޒް މިނިސްޓްރީން ކޮށްފައިވާ ޖޫރިމަނާއަކީ ސާބިތު ދަރަންޏެއް ކަމަށް ކަނޑައަޅާ ކަމަށާއި އެހެންވެ، އެ ފައިސާ މި މަހުގެ 15 ވަނަ ދުވަހުން ފެށިގެން 30 ދުވަސް ތެރޭގައި ދައްކަން އަންގާ ކަމަށެވެ.
މީގެ އިތުރުން މަސްވެރިކަން ކުރި އުޅަނދު ދައުލަތަށް ނެގުމަށް ވެސް އަމުރު ކޮށްފައިވެ އެވެ.
މީގެ ކުރިން ވެސް ރާއްޖޭގެ ކަނޑުގެ ސަރަހައްދަށް ވަދެ ގަވާއިދާ ހިލާފަށް މަސްވެރިކަން ކުރި ބޭރުގެ އުޅަނދުތަކެއް ދައުލަތަށް ނަގާފައިވެ އެވެ.