މި އަހަރުގެ އެހެން މަސްތަކާ ހިލާފަށް މިދިޔަ މަހުގެ ތެރޭގައި މަގުމަތީގެ އެކްސިޑެންޓްތައް މަދު ކަމަށް ފުލުހުން ބުނެފި އެވެ.
ފުލުހުން އާންމުކޮށްފައިވާ ތަފާސްހިސާބުން ދައްކާ ގޮތުގައި ޖެނުއަރީން ފެސިގެން ސެޕްޓެމްބަރު މަހުގެ ނިޔަލަށް ޖުމްލަ 2،192 އެކްސިޑެންޓް ރާއްޖޭގެ އެކި ހިސާބުތަކުން ރިޕޯޓްކޮށްފައިވެ އެވެ. އަދި މިދިޔަ މަހުގެ ތެރޭގައި ރިޕޯޓްކުރީ 186 އެކްސިޑެންޓެވެ. އެހެންވެ ސެޕްޓެމްބަރަކީ މި އަހަރުހެ މިހާތަނަށް އެކްސިޑެންޓްތައް އެންމެ މަދުން ރިޕޯޓްކުރި މަހެވެ.
ސެޕްޓެމްބަރު މަހުގެ ކުރިން ކޮންމެ މަހަކު ވެސް 200 އަށް ވުރަ ގިނަ އެކްސިޑެންޓް ރިޕޯޓްކޮށްފައިވެ އެވެ.
މިދިޔަ މަހުގެ ތެރޭގައި އެކްސިޑެންޓްތައް މަދު ނަމަވެސް ފާހަގަކޮށްލަން ޖެހޭ ކަމަކީ މާލެ އާއި ހުޅުމާލޭގައި ހިނގި އެކްސިޑެންޓްތަކެއްގައި ދެ ޒުވާނަކު މިދިޔަ މަހުގެ ތެރޭގައި މަރުވިކަމެވެ.
އެކްސިޑެންޓްތައް ރިޕޯޓްކުރި އަދަދުތައް:
* ޖެނުއަރީ: 263 އެކްސިޑެންޓް
* ފެބްރުއަރީ: 267 އެކްސިޑެންޓް
* މާޗު: 301 އެކްސިޑެންޓް
* އޭޕްރިލް: 219 އެކްސިޑެންޓް
* މެއި: 225 އެކްސިޑެންޓް
* ޖޫން: 214 އެކްސިޑެންޓް
* ޖުލައި: 210 އެކްސިޑެންޓް
* އޮގަސްޓު: 204 އެކްސިޑެންޓް
* ސެޕްޓެމްބަރު: 186 އެކްސިޑެންޓް
މިދިޔަ އަހަރު ޖުމްލަ 2،300 އެކްސިޑެންޓު ރިޕޯޓުކޮށްފައިވާ އިރު، އެ އަހަރުގެ ވެސް ސެޕްޓެމްބަރު މަހު ވެސް ރިޕޯޓުކޮށްފައި ވަނީ 186 އެކްސިޑެންޓެވެ.
މިދިޔަ މަހު އެކްސިޑެންޓުތައް މަދުވެފައި ވަނީ، މާލޭ ސަރަހައްދުގައި ނުރައްކާތެރި އެކްސިޑެންޓުތައް އިތުރުވުމާއެކު މަގުމަތީގައި ފުލުހުން ހަރަކާތްތެރިވާ މިންވަރު އިތުރުކުރި ފަހުންނެވެ.
ފަހަކަށް އައިސް މާލެ އާއި ހުޅުމާލޭގައި ހިނގާ އެކްސިޑެންޓްތައް ވަރަށް ބޮޑަށް އިތުރުވެފައިވާތީ ޓްރެފިކް ފުލުހުންގެ ދައުރު ކުރިއަށް ވުރެ މިހާރު ބޮޑުކޮށްފައިވެ އެވެ. އެގޮތުން މަގުމަތީގައި ހަރަކާތްތެރިވާ އިރު، ކޮންމެ ފަސް މިނެޓަކުން ފުލުހަކާ ދިމާވާ ގޮތަށް ފުލުހުން އިތުރުކޮށްފައިވެ އެވެ.