ވަރަށް ގިނަ ބަޔަކު އިންތިޒާރު ކުރަމުން އަންނަ ހޮލީވުޑްގެ އެނިމޭޝަން ފިލްމު "މޮއާނާ 2" ބޮކްސް ފޯހުގައި ބޮޑު ކާމިޔާބީއެއް ހޯދާނެ ކަމަށް އަންދާޒާކޮށްފި އެވެ.
އަންނަ މަހުގެ 27 ގައި މި ފިލްމު ސިނަމާތަކަށް ގެނެސްދޭ އިރު، ހޮލީވުޑްގެ ވިޔަފާރި ދިރާސާ ކުރާ ފަރާތްތަކުން ބުނާ ގޮތުގައި މި ފިލްމު ރިލިޒްކުރާ ހަފުތާ ބަންދުގައި އެކަނި ވެސް 100 މިލިއަން ޑޮލަރުގެ އާމްދަނީއެއް ހޯދުމުގެ ފުރުސަތު ވަރަށް ބޮޑެވެ.
ޑިޒްނީގެ މި ފިލްމަކީ އެ ސްޓޫޑިއޯ އިން 2016 ގައި ގެނެސްދިން ކާމިޔާބު ފިލްމު "މޮއާނާ" ގެ ދެވަނަ ބައެވެ. ބޮކްސް އޮފީހުގައި 687.2 މިލިއަން ޑޮލަރުގެ އާމްދަނީއެއް ހޯދި އެ ފިލްމަކީ ޖޯން މަސްކާ އާއި ރޮން ކްލެމެންޓްސް ޑައިރެކްޓްކުރި މިއުޒިކަލް ފެންޓަސީ އެޑްވެންޗާ ފިލްމެވެ.
"މޮއާނާ" އަކީ ޖުމްލަ 175 މިލިއަން ޑޮލަރުގެ ބަޖެޓަކުން ހެދި ފިލްމެކެވެ.
"މޮއާނާ 2" ޑައިރެކްޓްކުރީ ޑޭވް ޑެރިކް ޖޫނިއާ އެވެ. ނަމަވެސް މީގެ ބަޖެޓް ހާމަކޮށްފައެއް ނުވެ އެވެ.
"މޮއާނާ 2" ވެސް ކުރީގެ ފިލްމުގެ މައިގަނޑު ކެރެކްޓާތަކަށް އަޑު އަޅައިދިން ފަންނާނުން އަޑު އަޅައި ދީފައިވެ އެވެ. އޭގެ ތެރޭގައި އެންމެ ފާހަގަކޮށްލެވޭ އެކަކީ ޑްވޭން ޖޯންސަން (ރޮކް) އާ ވައްތަރު ކެރެކްޓާ މައުއީ އަށް މި ފަހަރު ވެސް އޭނަ އަޑު އަޅައި ދީފައިވެ އެވެ.