ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު، ގުރުއާން ތަފްސީރު ކުރައްވައި ލިޔުއްވި "ހުލާސާ ތަފްސީރު" ގެ ތިން ބައި ވެސް ނެރުއްވައިފި އެވެ.
އެ ފޮތާ ބެހޭ ގޮތިން މަހާޒް ވިދާޅުވީ ފޮތަކަށް ފަހު ފޮތެއް ނެރެވުމަކީ ލިބިވަޑައިގަންނަވާ އުފަލެއް ކަމަށާއި ލިބެމުންދާ އެއްބާރުލުމަށް ޝުކުރު އަދާކުރާ ކަމަށެވެ.
"އަހަރެއްހާ ދުވހުގެ މުއްދަތުގައި ކީރިތި ގުރުއާނުގެ ދެބައިކުޅަ އެއްބައިގެ ހުލާސާ ތަފްސީރު ކިޔުންތެރިންނާ ހަމައަށް ފޯރުކޮށް ދެވުނީ،" އޭނަ ވިދާޅުވި އެވެ. "މިކަމަށްޓަކައި އަދިވެސް އެއްފަހަރު ކީރިތި ﷲއަށް ޝުކުރުވެރިވަން."
މަހާޒް ވިދާޅުވީ "ހުލާސާ ތަފްސީރު" ގެ ތިން ވަނަ ބަޔަކީ މިހާތަނަށް ލިޔެވުނު ބައިތަކުގެ ތެރެއިން އެންމެ ގަޔާވެގެން ލިޔެވުނު ބައި ކަމަށާއި އެ ވޮލިއުމް ފެށިގެން އަންނަނީ ގުރުއާނުގެ ހަ ވަނަ ފޮތުން ކަމަށެވެ.
ފޮތުގެ ތިންވަނަ ބައި މިހާރު ނޮވެލްޓީ ބުކްޝޮޕުންނާއި އެ ތަނުގެ ވެބްސައިޓުން ލިބެން ހުންނާނެ އެވެ. ޖުމްލަ 476 ސޮފުހާ "ހުލާސާ ތަފްސީރު" ގެ އަގަކީ 420ރ. އެވެ. ނަމަވެސް މި މަގުގެ 26، ގެ ނިޔަލަށް ކުރިއަށްދާ ނޮވެލްޓީ ބުކް ފެއާއިން އެ ފޮތް 357ރ. އަށް ގަންނަން ލިބޭނެ އެވެ.
މަހާޒްގެ "ހުލާސާ ތަފްސީރުގެ ފުރަތަމަ ވޮލިއުމް ބައި ނެރުނީ މިދިޔަ އަހަރުގެ އޮކްޓޯބަރު 17 ގަ އެވެ. އަދި ދެވަނަ ބައި ނެރުނީ މި އަހަރުގެ އެޕްރީލް މަހުގެ 19 ގަ އެވެ.