މި ސަރުކާރުން މާލީ ހިސާބުތައް އާންމު ނުކުރަނީ ހަގީގަތް އޮޅުވާލަން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަމީރު މިހެން ވިދާޅުވެފައިމިވަނީ ކުރީ ސަރުކާރުން ހަރަދުތައް ރެކޯޑު ކުރުމުގައި ހަދާފައި ހުރި ގޯސްތައް ބަލައި ފިޔަވަޅު އަޅަން މި ސަރުކާރުން ނިންމާފައިވާ ދަނޑިވަޅެއްގަ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ބަންޑާރަ ނައިބު އަހުމަދު އުޝާމް ވިދާޅުވީ މާލީ ހިސާބުތައް ބެލެހެެއްޓުމުގައި މިދިޔަ ސަރުކާރުން ރެކޯޑްކޮށްފައި ނެތް ދެ ބިލިއަން ރުފިޔާ އެބައޮތް ކަމަށެވެ. އަދި ކުރީ ސަރުކާރުން ހަރަދު ކުރުމަށްފަހު ޖެހިގެން އަންނަ އަހަރުގެ ބަޖެޓުގައި ވަރަށް ގިނަ ހިސާބުތައް ޖަހާފައިވާ ކަމަށާއި އެއީ ގާނޫނު އަސާސީ އާއި މާލިއްޔަތާ ގުޅޭ ގަވާއިދާ ހިލާފަށް ކުރަމުންދިޔަ ކަމެއް ކަމަށްވެސް އުޝާމް ވިދާޅުވި އެވެ.
މި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު މޫސާ ޒަމީރު ވަނީ މީގެކުރިން ކޮންމެ ހަފްތާއަކު އާންމުކުރަމުންދިޔަ ދައުލަތުގެ އާމްދަނީއާއި ހަރަދު ތަފްސީލް މިދިޔަ ޖޫން މަހުން ފެށިގެން ހާމަކުރުން ހުއްޓާލީވެސް ރެކޯޑްކޮށްފައި ނެތް ދެ ބިލިއަން ރުފިޔާއެއްގެ މައްސަލަ ފާހަގަވި ހިސާބުން ކަމަށް ވިދާޅުވެފަ އެވެ.
މިކަމާ ގުޅިގެން އަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ މި ސަރުކާރަށް އަހަރެއް ވެގެންދާއިރު ހިންގުނު އެއްވެސް ތަރައްޤީގެ މަޝްރޫއެއް ނެތް ކަމަށާއި އިޤްތިސާދީ ގިނަ ހަރަކާތްތައް ހުއްޓި، ރަށް ރަށުގެ އިޤްްތިސާދުތައް ހުއްޓިފައިވާ ކަމަށެވެ. އަދި މަސްވެރިން ވެސް ބިކަވެފައިވާ ކަމަށާއި މާލީ ތަފާސް ހިސާބުތައް ޝާއިއު ނުކޮށް ސަރުކާރުން އުޅެނީ އެއްވެސް މަޝްރޫއެއް ނުހިނގާ އިރުވެސް، ބަޖެޓުގެ ޚަރަދު ބޮޑުވެ، އިސްރާފުތައް ގިނަވެ، އަސްލު ހަޤީޤަތް އޮޅުވާލަން ކަމަށް އަމީރު ވިދާޅުވި އެވެ.
އަމީރު ވަނީ 49.9 ބިލިއަން ރުފިޔާގެ ބަޖެޓް ހުސްވިއިރު ހާލަތަށް ހެޔޮ ބަދަލެއް އައީ ސަރުކާރުގެ ސިޔާސީ މަޤާމްތަކުގައި ހާހުން ތިބި މީހުންނާއި ކުންފުނި ތަކުގައި ތިބި އެކްޓިވިސްޓުންނަށް އެކަނި ކަމަށްވެސް ވިދާޅުވެފަ އެވެ. އަދި ބަލާ ކަމެއް ބަލާފައި ވެސް މާލީ ތަފާސް ހިސާބުތައް ޝާއިއުކުރާހާ ދުވަސް މިހާރު ވެފައިވާ ކަމަށް އަމީރު ވިދާޅުވި އެވެ.