ރާއްޖޭން ދައުވާ ކުރަމުން ދަނިކޮށް ޗާގޯސްގެ ސިޔާދަތީ ބާރު މޮރިޝަސްއަށް ދިނުމަށް އިނގިރޭސިވިލާތުން ނިންމި ނިންމުމާ ގުޅިގެން ބޭރުގެ ތަޖުރިބާކާރުންގެ ލަފާ ހޯދަން ރާއްޖެ އިން ފަށައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ބަންޑާރަ ނައިބު އަހުމަދު އުޝާމް ވިދާޅުވީ އިނގިރޭސިވިލާތުގެ ނިންމުމާ ގުޅިގެން ބޭރުގެ ތަޖުރިބާކާރުންގެ ލަފާ ހޯދަން ފަށާފައިވާ ކަމަށާއި އެގޮތުން މިހާރުވެސް އެއް ތަޖުރިބާކާރެއްގެ ލަފާ ލިބިފައިވާ ކަމަށެވެ. އަދި މިކަމަކީ ބޭރުގެ ތަޖުރިބާކާރުންގެ ލަފާ ހޯދައިގެން ކުރެވޭ ޒާތުގެ ކަމެއް ކަމަށްވެސް އުޝާމް ވިދާޅުވި އެވެ.
ޗާގޯސްގެ ސިޔާދަތީ ބާރު މޮރިޝަސް އަށް ދޫކޮށްލަން އިނގިރޭސީން ނިންމީ މިކަމާ ގުޅޭ މަޝްވަރާތަކެއް ކުރިއަށްދާތާ ޒަމާންތަކެއް ފަހުންނެވެ.
މި ނިންމުމާ ގުޅިގެން މިކަމާ ގުޅޭ ގޮތުން އިނގިރޭސިވިލާތާއި މޮރިޝަޝްސް މުއާހަދާއެއްގައި ސޮއިކުރާނެ އެވެ. މިއާ އެކީ އިނގިރޭސީންގެ އަސްކަރީ މަރުކަޒެއް އޮތް ޑިއެގޯ ގާސިއާގެ ކޮންޓްރޯލް ނުގެއްލޭ ގޮތަށް ޗާގޯސްގެ ސިޔާދަތީ ބާރުވެރިކަން މޮރިޝަސްއާ ހަވާލު ކުރެވޭނެ އެވެ.
އިނގިރޭސިވިލާތުން ޗާގޯސް ޖަޒީރާ މޮރިޝަސްއަށް ދޭން އެއްބަސްވި އިރު، އދ. އިން މީގެ ކުރިން އެތައް ފަހަރެއްގެ މަތިން އެކަން އެގޮތަށް ކުރުމަށް އެދިފައިވެ އެވެ. އަދި އެ ޖަޒީރާގެ މައްޗަށް މޮރިޝަސްގެ ސިޔާދަތީ ބާރު ހިނގާ ކަމަށް ބުނެ އެ ގައުމުން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) މީގެ އެތައް އަހަރެއް ކުރިން ހުށަހެޅި މައްސަލައެއްގެ ހުކުމުން ޗާގޮސްގެ ސިޔާދަތީ ބާރު މޮރިޝަސް އަށް އޮތީ ދީފަ އެވެ.
ނަމަވެސް އިނގިރޭސިން މިހާތަނަށް އެ ނިންމުން ބަލައިގެންފައެއް ނުވެ އެވެ.