ރާއްޖޭގެ އޭވިއޭޝަން ސެކިއުރިޓީ ރެގިޔުލޭޓަރީ އޮތޯރިޓީގެ ޤާބިލްކަން އިތުރު ކުރުމުގެ ގޮތުން ސީބީޓީ ޓްރެއިނިން އާއި ޑޭޓާ މެނޭޖްމަންޓް ސޮފްޓްވެއާ ފޯރުކޮށް ދިނުމާ ގުޅޭ ގޮތުން އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގައި ސޮއިކޮށްފައި ވަނީ ޑިފެންސް މިނިސްޓްރީގެ ޑައިރެކްޓްރޭޓް އޮފް އޭވިއޭޝަން ސެކިޔުރިޓީ އެޑްމިނިސްޓްރޭޝަން (ޑަސާ) އާއި އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) ގެ ކޯޕަރޭޓް އޭވިއޭޝަން ސެކިޔުރިޓީ ޕްރޮގްރާމް އޭޝިޔާ ޕެސިފިކް (ކާސްޕް-އޭޕީ)އާ ދެމެދު އެވެ.
އިއްޔެ ސޮއިކުރި ކުރެވުނު އެއްބަސްވުމުގެ ދަށުން، އައިކާއޯގެ ފަންނީ ތަޖްރިބާކާރުން ފަރުމާކޮށްފައިވާ ކޮމްޕިޔުޓަ ބޭސްޑް އެކްސްރޭ އޮޕަރޭޓަރ ޓްރެއިންނިން ސިސްޓަމް ބޭނުންކޮށްގެން، ރާއްޖޭގެ އެއާޕޯޓްތަކުގައި އޭވިއޭޝަން ސެކިޔުރިޓީ ސްކްރީން ކުރުމުގެ މަސައްކަތް ކުރާ ސެކިޔުރިޓީ އޮފިސަރުން ތަމްރީންކުރުމާއި، އެ އޮފިސަރުން ރާއްޖޭގެ ނެޝަނަލް ސިވިލް އޭވިއޭޝަން ސެކިޔުރިޓީ ޓްރެއިނިން ޕޮލިސީގައި ބަޔާންކުރާ މިންގަނޑަށް ސެޓިފައި ކުރުމުގެ މަސައްކަތް ކުރަމުން ގެންދެވޭނެ އެވެ.
މި ސިސްޓަމް ބޭނުން ކުރަން ފެށުމުން ރާއްޖޭގެ އެކި ސަރަހައްދުތަކުގައި ޤާއިމުވެ ތިބި އޭވިއޭޝަން ސެކިޔުރިޓީ ކޮމާންޑްގެ އޮފިސަރުން އެކްސްރޭ އޮޕަރޭޓަ ޓްރެއިނިން މާލެ ނުގޮސް އެއާޕޯޓްތަކުގައި ތިބެގެން ތަމްރީން ހަދައި ސެޓިފައިވުމުގެ ފުރުސަތު ވެސް ލިބިގެންދާނެ އެވެ.
މީގެ އިތުރުން، އޯވަސައިޓް ރިޕޯޓިން އެންޑް ރިޒޮލިޔުޝަން (އޯއާރްއާރް)ގެ ނަމުގައި ފަރުމާކޮށްފައިވާ ސޮފްޓްވެއާ އަކީ ނޭޝަނަލް ސިވިލް އޭވިއޭޝަން ސެކިޔުރިޓީ ޕްރޮގްރާމްގައިވާ ޒިންމާތައް އަދާކުރާ އިދާރާތަކުން އެ ޒިންމާތައް އަދާކުރަމުން އަންނަ މިންވަރު ބެލުމަށްޓަކައި ހިންގޭ ކޮލިޓީ ކޮންޓްރޯލް ހަރަކާތްތަކުގެ ޑޭޓާތައް އިންތިޒާމީ ގޮތެއްގައި ރައްކާތެރިކަމާއެކު ބެލެހެއްޓޭނެ ގޮތަށް ފަރުމާކޮށްފައިވާ ސޮފްޓްވެއާއެކެވެ.
ރާއްޖެ އަކީ އައިކާއޯ އިން އިން މި ފަރުމާކުރި ސީބީޓީ ޓްރެއިނިން އާއި އަދި ޑޭޓާ މެނޭޖްމަންޓް ސޮފްޓްވެއާ ބޭނުންކުރުމަށްޓަކައި އެއްބަސްވުމުގައި ސޮއިކުރި ފުރަތަމަ ގައުމެވެ.