އޮޑިޓާ ޖެނެރަލްގެ އޮފީހުގެ 2025 ވަނަ އަހަރުގެ ބަޖެޓް ރައްޔިތުންގެ މަޖިލީހުން ފާސްކޮށްފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އޮޑިޓާ ޖެނެރަލްގެ އޮފީހުގެ 2025 ވަނަ އަހަރުގެ ބަޖެޓު ދިރާސާކޮށް މާލިއްޔަތު ކޮމިޓީން ނިންމިގޮތުގެ ރިޕޯޓަށް ވޯޓަށް އަހާފަ އެވެ. އޮޑިޓާ ޖެނެރަލްގެ އޮފީހުގެ ބަޖެޓް ފާސްކޮށްފައިވަނި ވޯޓުގައި ބައިވެރިވި 75 މެންބަރުންގެ އިއްތިފާގުންނެވެ.
އޮޑިޓާ ޖެނެރަލްގެ އޮފީހުގެ 2025 ވަނަ އަހަރަށް ފާސްކޮށްފައިވާ ބަޖެޓްގައި ރިކަރަންޓް ހަރަދާއި އޮފީސް ހިންގުމަށް ބޭނުންވާ ހަރުމުދާ ހޯދުމަށް ކުރާ ހަރަދުގެ ގޮތުގައި ކަނޑައަޅާފައިވަނީ 80.4 މިލިއަން ރުފިޔާ އެވެ. އަދި ޕަބްލިކް ސެކްޓާ އިންވެސްޓްމަންޓް ޕްރޮގްރާމްގެ ގޮތުގައި 34 މިލިއަން ކަނޑައަޅާފައިވެ އެވެ.
ޖުމުލަ 114.4 މިލިއަން ރުފިޔާގެ ބަޖެޓެއް އޮޑިޓާ ޖެނެރަލްގެ އޮފީހަށް ރައްޔިތުންގެ މަޖިލީހުން ފާސްކޮށްފައިވާއިރު އޮޑިޓާ ޖެނެރަލްގެ އޮފީހުގެ އާ އިމާރާތް އެޅުމުގެ މަސައްކަތަށްވެސް ބަޖެތް ހަމަޖައްސާފައިވެ އެވެ. މި އޮފީހުގެ މަސައްކަތް ފަށާފައިވަނީ 2022 ވަނަ އަހަރު އެވެ. މިއީ އެމްޓީސީސީއާ ހަވާލުކޮށްގެން ކުރިއަށގެންދާ މަސައްކަތެކެވެ.