ރާއްޖޭގައި ހިމާޔަތްކޮށްފައިވާ 96 ސަރަހައްދުގެ ތެރެއިން ރަނގަޅަށް ބެލެހެއްޓެނީ 5 ތަނެއްކަމަށް ތިމާވެއްޓާބެހޭ ވަޒީރު ތާރިގް އިބްރާހިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ތާރިގްއާ ސުވާލު ކުރުމަށް ލިބުނު ފުރުސަތުގައި ބާރަށު ދާއިރާގެ މެންބަރު އިބްރާހިމް ޝުޖާއު ވަނީ މިދިޔަ ސަރުކާރުގައި ގިނަ ތަންތަނެއް ހިމާޔަތްކޮށްފައިވާކަން ފާހަގަކޮށް އެތަންތަން ބެލެހެއްޓުމަށް ކުރެވޭ މަސައްކަތާއި ގުޅޭގޮތުން ސުވާލު ކޮށްފަ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ތާރިގް ވިދާޅުވީ ރާއްޖޭގެ 96 ސަރަހައްދެއް ހިމާޔަތް ކޮށްފައިވާ ކަމަށާއި އޭގެ ތެރެއިން ރަނގަޅަށް ބެލެހެއްޓެނީ އެންމެ 5 ތަން ކަމަށެވެ.
މިނިސްޓަރު ތާރިގް ވިދާޅުވީ މި ސަރުކާރުގެ އެއް އަމާޒަކީ ވީހާވެސް ގިނަ ސަރަހައްދުތަކެއް ހިމާޔަތްކޮށް މެނޭޖް ކުރުން ކަމަށެވެ. އެގޮތުން މިހާރު ރަނގަޅަށް ބެލެހެއްޓޭ 5 ތަނުގެ އިތުރުން ވީހާވެސް ގިނަ ތަނެއް މެނޭޖްކޮށް އެތަންތަނުން ނަފާ ލިބޭނެ ގޮތް ހެދުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވި އެވެ.
މި މަސައްކަތް ކުރުމަށާއި މި މަސައްކަތަށް ބޭނުންވާ މީހުން ތަމްރީނު ކުރުމަށް ބޭނުންވާ ފައިސާ ހޯދުމުގެ މަސައްކަތް ކުރިއަށްދާ ކަމަށާއި މިހާރުވެސް ފައިސާ ލިބެމުންދާ ކަމަށް ޠާރިޤު ވިދާޅުވި އެވެ.