ރާއްޖެއަށް މަސްތުވާތަކެތި އެތެރެކުރި މައްސަލައިގައި ހައްޔަރު ކުރި މީހާގެ ބަންދު މުއްދަތު ޖަހައިފި އެވެ.
މިދިޔަ ހޮނިހިރު ދުވަހު ވައިގެ މަގުން ބެންކޮކުން ރާއްޖެ އައި އުމުރުން 33 އަހަރުގެ ދިވެހި ފިރިހެނެއްގެ ލަގެޖުން މަސްތުވާތަކެތި ފެނުމުން އެމީހާ ވަނީ ހައްޔަރުކޮށްފަ އެވެ.
އޭނާގެ ބަންދު މުއްދަތު ޖެހުމަށް އިއްޔެ ކްރިމިނަލް ކޯޓަށް ގެންދިއުމުން އެ ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފަ އެވެ.
މި މީހާގެ ލަގެޖުން ފެނުނު މަސްތުވާތަކެތި ކަމަށް ޝައްކު ކުރެވޭ ތަކެތި، ފުރަތަމަ މަރުހަލާގައި ތަޙުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ މެފެޑްރޯން އަށް ވަނީ ޕޮޒިޓިވް ވެފައިވާ ކަމަށް ކަސްޓަމްސް އިން ބުނެ އެވެ. މިތަކެތީގެ ބަރުދަނުގައި ޕެކިންއާއެކު ޖުމްލަ 1.86 ކިލޯ ހުރިއިރު، މިތަކެތީގެ މަގުމަތީ އަގަކީ 3,348,000.00 ރުފިޔާ ކަމަށް ލަފާކުރެވޭކަމަށް ކަސްޓަމްސް އިން ބުނެ އެވެ.