ރާއްޖޭގެ ސަަރަހައްދު ބަލަހައްޓަން ގެނައި ޑްރޯންތަކާ ގުޅޭ ގޮތުން ޑިފެންސް މިނިސްޓަރު ޣައްސާން މައުމޫނާ ސުވާލު ކުރަން މަޖިލީހަށް ހާޒިރުކުރަން ނިންމައިފި އެވެ.
މިނިސްޓަރާ ސުވާލުކުރަން ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމެވެ.
އޭނަ ހުށަހެޅުއްވީ ޑްރޯންތައް ބޭނުންކުރަން ފަށާފައިވޭތޯ އާއި އެ ޑްރޯންތައް މިހާތަނަށް ބޭނުންކުރެވިފައި ވަނީ ކޮންކޮން ބޭނުމަކުތޯ ސާފުކޮށް ދެއްވުމަށެވެ.
ތުރުކީން ގެނައި ޑްރޯންތަކާ އެކީ އެމްޑީއެފްގައި އަލަށް ވައިގެ ބާރެއް އުފައްދައި އެކަން އިފުތިތާހުކުރީ މާޗް މަހު އެވެ. މި ޑްރޯންތައް ގެނެސްފައި ވަނީ 570 މިލިއަނެއް ރުފިޔާ ހޭދަކޮށްގެންނެވެ. ފުރަތަމަ ގެނައީ ތިން ޑްރޯން އެވެ. ނަމަވެސް ފަހުން އިތުރު ޑްރޯންތައް ގެންނާނެ ކަމަށް ބުނެފައިވެ އެވެ.
މިއީ އިންޓެލިޖެންސް އޮޕަރޭޝަންތަކާއި ސަވައިލެންސް އޮޕަރޭޝަންތައް ކުރިއަށް ގެންދިއުމުގެ ގާބިލުކަން ލިބިފައިވާ ޑްރޯންތަކެކެވެ.