ސަރުކާރުގެ ޚަރަދުތައް ކުޑަކުރަން ވަކިކުރާ ސިޔާސީ މީހުން ލަނީ އެސްއޯއީތަކަށް ކަމަށާއި އެކަމުގެ ސަބަބުން ލިބޭނެ ލުއެއް ނެތް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ އެމްޑީޕީ މެމްބަރު އަހުމަދުދީދި ވިދާޅުވެއްޖެއެވެ.
އެމްޑީޕީން ރޭ ބޭއްވި 'ހަވަރު ބެރު" ޕެނަލް ޑިސްކަޝަންގައި އޭނަ ވިދާޅުވީ މި ސަތުކާރުގެ ސިޔާސީ މަގާމުތަކުގެ އަދަދު ހާމަނުކުރުމަކީ ވެސް ވަރަށް ބޮޑު ކަންބޮޑުވުމެއް ކަމަށެވެ.
ނަމަވެސް މިދިޔަ ހަފުތާގައި 228 ސިޔާސީ މުވައްޒަފަކު ވަކިކުރަން ނިންމިކަން ސަރުކާރުން އިއުލާންކޮށްފައިވެ އެވެ.
އަހުމަދުދީދީ ވިދާޅުވީ އެ މީހުން ވަކިކޮށް މިހާރު ލަނީ ސަރުކާރު ހިއްސާވާ ކުންފުނިތަކަށް ކަމަށެވެ.
"އެހެން ދިމާއަކުން މި ބޭފުޅުންނަށް އެބަ ޚަރަދު ކުރޭ. އެހެންކަމަށް ވާނަމަ، ސަރުކާރަށް މީގެ ސަބަބުން ލިބޭނެ ލުޔެއް އަދިއެއް ނެތް." އޭނަ ވިދާޅުވި އެވެ.
އަހުމަދުދީދީ ވިދާޅުވީ ކުންފުނިތަކަށް އެމީހުން ބަދަލުކުރުމުން ސަރުކާރު މުވައްޒަފުންގެ ލިސްޓުން އެ މީހުން ގެއްލުނަސް ކަމުގައި ، ޚަރަދު ކުރާ ލިސްޓުން އެމީހުން ނުގެއްލޭނެ ކަމަށެވެ. އަދި މި ސަރުކާރަކީ ފަހުގެ ތާރީޚެއްގައި ރައްޔިތުން ދެކޭ އެންމެ މަތިބަރު ސަރުކާރު ަކަމަށް ވެސް ވިދާޅުވި އެވެ.
އަދި މިފަދަ ގޮތަކަށް ސަރުކާރުން އަމަލު ކުރާތީ މިހާރު ފެންނަނީ ހިތުހުރި ގޮތަކަށް ސިޔާސީ މަގާމުތައް ދޭ ތަން ކަމަށް ވެސް އަހުމަދުދީދީ ވިދާޅުވި އެވެ.