ޝާހިދު ކަޕޫރް ސޮއިކޮށްފައިވާ ޑައިރެކްޓަރު ވިޝާލް ބަރަދްވާޖްގެ އާ ފިލްމުގައި ކުޅޭ ގޭންގްސްޓާރުގެ ރޯލަށް މިހާރު ތައްޔާރުވާން ފަށާފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ ރަސްމީކޮށް އަދި ނަން އިއުލާން ނުކުރާ މި ފިލްމުގައި ޝާހިދު ކުޅޭނީ ކުރީގެ މަޝްހޫރު ގޭންގްސްޓާރު ދާއޫދު އިބްރާހީމާ ބޮޑު ވާދަވެރިކަމެއް އޮތް ހުސައިން އުސްތާރާގެ ރޯލު ކަމަށެވެ.
ފިލްމުގެ ޝޫޓިން އަންނަ ޑިސެމްބަރު މަހުގެ ތެރޭގައި ފަށަން ޕްލޭންކޮށްފައިވާ އިރު، ޝާހިދުގެ އިތުރުން ބަތަލާ ޓްރިޕްތީ ދިމްރީ ވެސް މިހާރު ފިލްމުގައި ކުޅެން ޖެހޭ ކެރެކްޓާ އަށް ތައްޔާރުވާން އެކްޓިން ވޯކްޝޮޕްތަކެއްގައި ބައިވެރިވަމުން އަންނަ ކަމަށް މީޑިއާތަކުން ބުންޏެވެ.
މި ފިލްމަކީ ވިޝާލްއާ އެކީ ޝާހިދު މަސައްކަތްކުރާ ހަތަރު ވަނަ ފިލްމެވެ. އެ ދެ މީހުން އެކީގައި އެންމެ ފަހުން ގެނެސްދިން ފިލްމަކީ 2017 ގެ "ރަންގޫން" އެވެ. އޭގެ ކުރިން ވިޝާލްގެ 2014 ގެ "ހައިދަރު" އާއި 2009 ގެ "ކަމީނޭ" ގައި ޝާހިދު މަސައްކަތްކުރި އެވެ.
މި އަހަރުގެ ފެބްރުއަރީގައި ރިލީޒްކުރި "ތޭރީ ބާތީ މޭ އޭސާ އުލްޖާ ޖިއާ" އަށް ފަހު، ޝާހިދު، 43، އެންމެ އަވަހަށް ފެންނާނީ އަންނަ އަހަރުގެ ފެބްރުއަރީ 14 ގައި ގެނެސްދޭ އެކްޝަން ތުރިލާ "ދޭވާ" އިިންނެވެ.