އައްޑޫ ސިޓީ ހިތަދޫ ބޮޑު މަގުގައި ނުރައްކާތެރި އެކްސިޑެންޓެއް ހިނގައިފިއެވެ.
މައުލޫމާތު ލިބިފައިވާ ގޮތުގައި ހިތަދޫ ބޮޑުމަގުގައި ހުންނަ ސިޓީ ސެންޓްރަލް ފިހާރަ ކުރިމަތިން މި އެކްސިޑެންޓް ހިނގާފައިވަނީ ބާރު ސްޕީޑްގައި ދުއްވާފައި ދިޔަ 2 ސައިކަލް ޖެހިގެންނެވެ.
ހިތަދޫ ބޮޑު މަގުގައި ބާރު ސްޕީޑްގައި ދުއްވުން ހުއްޓުވުމަށްޓަކައި ފުލުހުން ޖަހާފައިވާ ބެރިކޭޑެއްގައި އެކްސިޑެންޓްވި އެއް ސައިކަލުން ޖެހި ބެރިކޭޑް ވެސް ވަނީ ފަޅައިގެން ގޮސްފައެވެ. އެކްސިޑެންޓްގައި ޒަޚަމްވި 2 މީހަކަށް ހިތަދޫ ރީޖަނަލް ހޮސްޕިޓަލްގައި މިހާރު ފަރުވާދެމުން އަންނައިރު އެމީހުންގެ ހާލު ސީރިއަސް ނޫން ކަމަށް މައުލޫމާތު ލިބެއެވެ.
އެކްސިޑެންޓް ހިނގި މަންޒަރު ދުށް މީހަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެކްސިޑެންޓް ހިނގާފައިވަނީ ބާރު ސްޕީޑްގައި މަގުގެ ދެކޮޅަށް ދުއްވާފައި ދިޔަ 2 ސައިކަލް ޖެހިގެންނެވެ.
"ފުލުހުން ޖަހާފައި ހުރި ބެރިކޭޑުތަކާއި ހިސާބުން ދެ ސައިކަލް އަޅައިގަތީ. 60 ކިލޯމީޓަރަށް ވުރެ ބާރަށް 2 ސައިކަލްވެސް ދުއްވާފައިވަނީ. " އޭނާ ބުންޏެވެ.
