އޮޕަރޭޝަން "ކުރަނގި" ގެ ދަށުން މިހާތަނަށް 6،000 އަށް ވުރެ ގިޖނަ ބިދޭސީންގެ ބައޮމެޓިކް ޑޭޓާ މިހާރު ނަގާފައިވާ ކަމަށް ހޯމްލޭންޑް މިނިސްޓްރީން ބުނެފި އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަލީ އިހުސާން ވިދާޅުވީ މި އަހަރުގެ މެއި 2 ގައި ފެށި ޕްރޮގްރާމްގެ ގެ ދަށުން މިހާތަނަށް 6،891 ބިދޭސީންގެ މައުލޫމާތު ނަގާފައިވާ ކަމަށެވެ. އަދި އޮޕަރޭޝަން މުޅި ރާއްޖެ އަށް މިހާރު ފުޅާކޮށްފައިވާކަން ވެސް މިނިސްޓަރު ފާހަގަކުރެއްވި އެވެ.
"މިހާތަނަށް އަށްޑިހަ ދެ ރަށެއްގައި ދިރިއުޅޭ ބިދޭސީންގެ މަޢުލޫމާތު އެއްކޮށްފައިވޭ. އަޅުގަނޑުމެންގެ އަމާޒަކީ އަންނަ އަހަރުގެ އޭޕްރީލް އައުމުގެ ކުރިން ހުރިހާ މަސައްކަތެއް ނިންމާލުން. އެއީ ފުރަތަމަ ފޭސް،" އިހްސާން ވިދާޅުވި އެވެ. "އަދި މިހާރު މިފެންނަ އިންޑިކޭޝަންތަކަށް ބަލާއިރު އަންނަ އަހަރުގެ ޖެނުއަރީގެ ނިޔަލަށް މި މަސައްކަތް ނިންމިދާނެ."
ޕްރޮގްރާމުގެ ފުރަތަމަ މަރުހަލާގައި ބިދޭސީ މަސައްކަތްތެރިންގެ މައުލޫމާތު އެއްކުރި ނަމަވެސް އެ ފަރާތްތަކާ މެދު ފިޔަވަޅު އެޅުމަކީ މަގުސަދެއް ނޫނެވެ. އެގޮތުން ގަވާއިދާ ޚިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުސަތު ފަހިކޮށް ދޭނެ އެވެ.
ފުރަތަމަ މަރުހަލާ ނިމުމަށް ފަހު ރަސްމީ ލިޔެކިޔުން ނެތި، ގަވާއިދާއި ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަނެއް ހަދައި، ޤައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލުމަށް ވަނީ ނިންމައިފަ އެވެ.
ސަރުކާރުގެ އަމާޒަކީ ތިން އަހަރުގެ ތެރޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމެވެ.