ހުޅުމާލެ އިން ސިނާއީ ބޭނުމަށް ވިއްކަން އިއުލާންކުރި ބިންތަކުގެ ބޮޑުމިން ކުޑަކޮށް، އަގު ވެސް ކުޑަކޮށްފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ މި މަހުގެ 1 ގައި އިއުލާންކުރީ ފޭސް ދޭއްގެ އިންޓަގްރޭޓެޑް ހަބުން 12 ބިމެއް ވިއްކުމަށެވެ. އެއީ 3،746 އަކަފޫޓުގެ އަށް ބިމަކާއި 3689 އަކަފޫޓުގެ ހަތަރު ބިމެކެވެ. ނަމަވެސް މިހާރު 16 ބިމެއް ވިއްކަން ވަނީ ނިންމައިފަ އެވެ. އެއީ 1،538 އަކަފޫޓުގެ 12 ބިމާއި 1515 އަކަފޫޓުގެ ހަތަރު ބިމެވެ.
ކުރިން ބިންތައް ވިއްކައިލަން ހުޅުވާލި އިރު، އިއުލާނުގައި ބުނެފައި ވަނީ ބީލަން ފެށޭ އަގަކީ އަކަފޫޓަކަށް 7،500ރ. އެވެ. ނަމަވެސް މިހާރު އަގު ވަނީ އަކަފޫޓަކަށް 5،500ރ. އަށް ކުޑަކޮށްފަ އެވެ.
ބިން ގަނެވޭނީ އުމުރުން 18 އަހަރުވެފައިވާ ދިވެއްސަކަށް ނުވަތަ 100 ޕަސެންޓު ދިވެހި ކުންފުންޏަކަށެވެ. ކޮންމެ ފަރާތަކަށް އެންމެ ގިނަވެގެން ގަނެވޭނީ ތިން ބިމެވެ.
ބިން ގަތުމަށް ބިޑު ހުށަހަޅަންޖެހޭނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ.