މާލެ ޕޮލިހުންގެ ފޯރަމް ބާއްވައިފި އެވެ.
ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން މާހައުލެއް ގާއިމުކޮށް ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ހަރުދަނާކުރުމުގެ ގޮތުން ފޯރަމް ބޭއްވީ "ޕާފޯމަންސް އެންހޭންސްމަންޓް" ގެ ނަމުގަ އެވެ.
ސްޓެލްކޯ ސެމިނާ ރޫމުގައި އިއްޔެ ބޭއްވި ފޯރަމް ފައްޓަވަ އިދެއްވީ ޕޮލިސް ކޮމިޝަނަރު ޢަލީ ޝުޖާއު އެވެ.
މާލެ ޕޮލިހުގެ އެކި ބަހާތައް ހިމެނޭ ގޮތަށް އެކި ރޭންކުތަކުގެ ފުލުހުން ބައިވެރިވި ފޯރަމަކީ ދިވެހި ފުލުހުންގެ ޚިދުމަތުގެ ގާނޫނުން ފުލުހުންނާ މަތިކޮށްފައިވާ މަސްއޫލިއްޔަތުތަކާއި ޒިންމާތަކުގެ ތެރެއިން، ފުލުހުންގެ މަސައްކަތްތައް ކުރުމަށް ހެދިފައިވާ އެކި އުސޫލުތަކުންނާއި ކުރިއަށް އޮތް ހަތަރު އަހަރަށް ތައްޔާރުކޮށްފައިވާ ސްޓްރެޓިޖިކް ޕްލޭން 2024 ގައި މާލެ ޕޮލިސް ކޮމާންޑާ މަތިކުރެވިފައިވާ ޒިންމާތަކާއި މަސްއޫލިއްޔަތުތަކަށް އަހުލުވެރިވެ އަދި އެ ޒިންމާތަކާއި މަސްއޫލިއްޔަތުތައް އެންމެ އެދެވޭ ގޮތުގައި އަދާކުރުމަށްޓަކައި ކުރަން ޖެހޭ މަސައްކަތްތައް ދެނެގަނެ އެކި ބަހާތަކުގެ މެދުގައި މަޝްވަރާކޮށް ގައިޑްލައިންތަކެއް ތައްޔާރުކުރުމަށް ބޭއްވި ފޯރަމެކެވެ.
ފޯރަމްގައި މާލެ ޕޮލިސްގެ މަސައްކަތްތަކަކީ ރައްޔިތުން ބަލައިގަންނަ އަދި ގާނޫނީ އިމުގެ ތެރެއިން ކުރެވޭ މަސައްކަތްތަކަށް ހެދުމާއި އެކި ހާލަތްތަކާ ގުޅިގެން އަންނަ ބަދަލުތައް ދުވަހުން ދުވަހަށް އެނގޭނެ ގޮތަށް އެތެރޭގެ ކޮމިއުނިކޭޝަން ނިޒާމެއް ގާއިމުކޮށް ގުޅިގެން މަސައްކަތްކުރާނެ ގޮތްތަކެއް ކަނޑައަޅައި މަޝްވަރާކޮށްފައިވެ އެވެ.
އަދި މަސައްކަތްތަކުގައި ހުރި ގޮންޖެހުންތައް ކުޑަކުރުމަށް ކަންކަން ދެނެގަނެ، ކޮމާންޑުގެ ބަހާތަކުގައި ތިބި ފުލުހުން ކުރަން ޖެހޭ މަސައްކަތްތަކަށް އިތުރަށް އަހުލުވެރިކޮށް ތާޒާކުރުވުމަށް އެކި ދާއިރާތައް ކަނޑައެޅުމުގެ އިތުރުން އަންނަ އަހަރުގެ އެކްޓިވިޓީ ކަލަންޑަރު އެކުލަވައިލުމުގެ މަސައްކަތްކޮށްފައިވެ އެވެ.
މީގެ އިތުރުން ބައިވެރިންގެ ހިޔާލާއި މަޝްވަރާ ހޯދުމަށް ޕްރެޒެންޓޭޝަންތައް ތައްޔާރުކޮށް ހުށަހެޅުން ވެސް ފޯރަމްގެ ތެރެއިން ކުރިއަށް ގެންގޮސްފައިވެއެވެ.
ފޯރަމްގެ ބައިވެރިންގެ މެދުގައި ޓީމް ބިލްޑިން ހަރަކާތްތަކެއް މިއަދު ވިލިމާލޭގައި އަންނަނީ ބާއްވަމުންނެވެ.