ހިޒްބުﷲ ޖަމާއަތުގެ އިތުރު ލީޑަރަކު އަވަހާރަކޮށްލާފައިވާ ކަމަށް އިޒްރޭލުން ބުނެފި އެވެ.
މި މަހުގެ 3 ގައި ލުބުނާންގައި ދިން ހަމަލާތަކެއްގައި އަވަހާރަކޮށްލާފައި ވަނީ ހިޒްބްﷲ ޖަމާއަތު އެކްޒެކެޓިވް ކައައުންސިލްގައި ހިމެނިވަޑައިގަންނަވާ ހާޝިމް ސައިފުއްދީނެވެ. އޭނަ އަކީ މިދިޔަ މަހުގެ 27 ގައި ހިޒްބްﷲ ގެ ލީޑަރު ނަސްރުﷲ ހަސަން އިޒްރޭލުގެ ހަމަލާތަކެއްގައި އަވަހާރަކޮށްލުމާ ގުޅިގެން ދެން އެ ޖަމާއަތުގެ އެންމެ އިސްވެރިއަކަށް ގެންނަން ނިންމާފައިވާ ބޭފުޅާ ކަމަށް މީޑިއާތަކުން ރިޕޯޓްކޮށްފައިވެ އެވެ.
އިޒްރޭލުން ބުނެފައި ވަނީ ސައުފުއްދީން އަވަހާރަކޮށްލަން ދިން ހަމަލާގައި ހިޒްބްﷲ ޖަމާއަތުގެ އިންޓެލިޖެންސް ކުއާޓަރުގެ ކޮމާންޑަރު އަލީ ހުސައިން ހާޒިމާ ވެސް އަވަހާރަކޮށްލާފައިވާ ކަމަށެވެ،
ނަމަވެސް މިކަމާ ގުޅޭ ގޮތުން އެ ޖަމާއަތުން ރަސްމީކޮށް އަދި ވަކި އެއްޗެއް ނުބުނެ އެވެ.
ޔަހޫދީން ދަނީ މިދިޔަ މަހުގެ ތެރޭގައި ލުބްނާނަށް އަރައި، އެ ގައުމު ސުންނާފަތި ކުރުމުގެ މަސައްކަތް ކުރަމުންދާ އިރު، ހަމަލާތައް އެންމެ ބޮޑަށް އަމާޒު ކުރަނީ ހިޒްބުﷲ ގެ ވެރިންނަށެވެ. ނަމަވެސް ހަމަލާތަކުގައި މިހާތަނަށް އާންމުންގެ އެތައް ބައެއްގެ ފުރާނަ ވެސް ވަނީ ގެއްލިގެން ގޮސްފަ އެވެ.