ބޮލީވުޑްގެ މަޝްހޫރު ޑައިރެކްޓަރު ކަރަން ޖޯހަރް ޑައިރެކްޓް ކުރަން ހަމަޖެހިފައިވާ އަލަތު ވެބް ސީރީޒްގެ ނަމަކީ "ޖެޓް ސެޓް ގޯ" ކަމަށް ރިޕޯޓްތައް ބުނެފި އެވެ.
މީޑިއާތަކުން މިއަދު ބުނީ އޭނަގެ ދަރުމާ ޕްރޮޑަކްޝަންސްގެ ވެބް ކޮންޓެންޓް ގޮފި، ދަރުމަޓިކް އެންޓަޓައިންމަންޓާއި ނެޓްފްލިކްސް ގުޅިގެން ހަދަން ނިންމާފައިވާ ސީރީޒްގެ ވާހަކަ ބިނާކޮށްފައި ވަނީ އޭވިއޭޝަން ދާއިރާއަށް ކަމަށެވެ. ބޮލީވުޑް ހަންގާމާ އިން ބުނީ "ޖެޓް ސެޓް ގޯ" ގެ ޝޫޓިން ފަށަން ހަމަޖެހިފައި ވަނީ އަންނަ އަހަރުގެ ފެބްރުއަރީ މަހުގެ ތެރޭގައި ކަމަށާއި ޕްލޭންކޮށްފައި އޮތީ ޝޫޓިން ފަށާ ގޮތަށް އެއްވާނެއްގައި ކުރިއަށް ގެންގޮސް މުޅި ސީރީޒް ނިންމައިލަން ކަމަށެވެ.
ނަމަވެސް މީގެ ކާސްޓުންނަކީ ކޮބައި ކަމެއް އަދި ނޭނގެ އެވެ.
ކަރަން އަކީ އަބަދު ވެސް އޭނަގެ ޑައިރެކްޝަންތަކުގައި އެންމެ މަޝްހޫރު ތަރިންނާ އެކީ މަސައްކަތްކުރާ ޑައިރެކްޓަރަކަށްވާތީ އަލަތު ވެބް ސީރީޒުން ވެސް މަޝްހޫރު ތަރިންތަކެއް ފެނުމުގެ ފުރުސަތު ބޮޑެވެ.
"ކުޗް ކުޗް ހޯތާ ހޭ" އާއި "ކަބީ ހުޝީ ކަބީ ޢަމް" އަދި "އޭ ދިލް ހެ މުޝްކިލް" ފަދަ މަގުބޫލު ފިލްމުތައް ގެނެސްދިން ކަރަންގެ އެންމެ ފަހުގެ ފިލްމަކީ މިދިޔަ އަހަރުގެ "ރޮކީ އޯރް ރާނީ ކީ ޕްރޭމް ކަހާނީ" އެވެ. މިދިޔަ އަހަރު އޭނަ އޮތީ އެކްޝަން ފިލްމެއް ޑައިރެކްޓްކުރަން ވެސް އިއުލާންކޮށްފަ އެވެ.
އެކަމަކު އޭގެ ނަމާއި ކާސްޓުން އަދި ހާމައެއް ނުކުރެ އެވެ.