މަންމައަށް ވަޅިން ހަމަލާދީ މަރާލާނެ ކަމަށް ބުނެ އިންޒާރު ދިން މީހާ ބަންދު ކޮށްފި އެވެ.
މި މައްސަލައިގައި ހައްޔަރުކުރީ، ހ. އެހަޑަ، މުހައްމަދު އިސްމާއިލް (28އ) އެވެ.
ފުލުހުން މިއަދު ބުނެފައިވަނީ މިމައްސަލައިގައި ހައްޔަރު ކުރި މީހާގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރު ކުރުމުން 10 ދުވަހަށް ބަންދު ކުރުމަށް އަމުރު ކޮށްފައިވާ ކަމަށެވެ.
މި މައްސަލައިގައި ފުލުހުން އިއްޔެ ބުނެފައިވަނީ ހުޅުމާލޭ ދެވަނަ ފިޔަވަހީގައި ހުންނަ ހިޔާ ފުލެޓުގެ އެޗް13ގެ އެޕާޓްމަންޓަކުން އަންހެނަކު ރޯ އަޑު އިވޭ ކަމަށް އިއްޔެ އިރުއޮއްސި 18:17 އެހާކަންހާއިރު ފުލުހުންނަށް ރިޕޯޓުކުރި ކަމަށެވެ.
އެ އެޕާޓްމަންޓަށް ފުލުހުން ދިއުމުން 57 އަހަރުގެ އަންހެނެކު ދޮރު ހުޅުވި ކަމަށާއި އެ މީހާގެ ދަރިފުޅު އޭނާއަށް އަނިޔާކުރުމަށް ފަހު، ވަޅިން ހަމަލާދީ މަރާލާނެ ކަމަށް ބުނެ އިންޒާރުދީފައިވާ ކަމަށް އެ މީހާއާ ހަވާލާދީ ފުލުހުން ބުންޏެވެ. އަދި އަންހެން މީހާގެ ފޯނު ފޭރިގަނެފައިވާ ކަމަށްވެސް އަންހެން މީހާ އާ ހަވާލާދީ ފުލުހުން ވަނީ ބުނެފަ އެވެ. އަދި އަންހެން މީހާއަށް ހޮސްޕިޓަލުގައި ފަރުވާ ދިނުމަށްފަހު ދޫކޮށްލާފައިވާ ކަމަށް މައުލޫމާތު ދީފައިވެ އެވެ.