ބޮލީވުޑްގެ އެކްޓަރު އަބީޝެކް ބައްޗަންގެ އާ ފިލްމު "އައި ވޯންޓް ޓު ޓޯކް" އަންނަ މަހު ސިނަމާތަކަށް ގެންނަން ނިންމައި އޭގެ ޓީޒާ ޓްރެއިލާ މިއަދު ދައްކާލައިފި އެވެ.
މި ފިލްމަކީ ވަރަށް ކާމިޔާބު ފިލްމުތަކެއް ގެނެސްދީފައިވާ އަދި ނެޝަނަލް އެވޯޑް ވެސް ހޯދާފައިވާ ޑައިރެކްޓަރު ޝޫޖިތު ސިރްކާގެ ފިލްމެކެވެ. "އައި ވޯންޓް ޓޫ ޓޯކް" އަކީ އޭނަ އަބީޝެކާ އެކީ މަސައްކަތްކުރި ފުރަތަމަ ޕްރޮޖެކްޓެވެ. އަބީޝެކްގެ ބައްޕަ އަމީތާބް ބައްޗަނާ އެކީ ޝޫޖިތު ދެ ފިލްމެއް ގެނެސްދީފައިވެ އެވެ. އެއީ 2015 "ޕީކޫ" އާއި 2020 ގެ "ގްލޯބާ ސިތާބޯ" އެވެ.
"ވިކީ ޑޯނާ" އާއި "މެޑްރާސް ކެފޭ" އަދި "އޮކްޓޯބާ" ވެސް ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ 2021 ތާރީހީ ބައޮގްރަފިކަލް ޑްރާމާ "ސަރުދާރު އުދަމް" އެވެ.
އަންނަ މަހުގެ 22 ގައި "އައި ވޯންޓް ޓު ޓޯކް" ގެނެސްދޭން ނިންމި އިރު، އަބީޝެކްގެ އެންމެ ފަހުގެ ފިިލްމަކީ މިދިޔަ އަހަރު ޑައިރެކްޓަރު އާރް ބަލްކީ ގެނެސްދިން ސްޕޯޓްސް ޑްރާމާ "ގޫމަރް" އެވެ. ބަތަލާ އައިޝްވާރިއާ ރާއީގެ ފިރިމީހާގެ ކުރިއަށް ހުރި ފިލްމުތަކުގެ ތެރޭގައި ރެމޯ ޑި ސޫޒާގެ "ބީ ހެޕީ" އާއި ތަރޫން މަންސުކާނީގެ "ހައުސްފުލް 5" ހިމެނެ އެވެ.