ޕިއްޒާ ވިއްކާ ޖަރުމަންގެ ރެސްޓޯރަކުން މެނޫގައި ހިމެނޭ "ހާއްސަ" ޕިއްޒާއަކާ އެކު މަސްތުވާތަކެތި ވިއްކާ މައްސަލައެއް ފެންމަތިވެ އެކަން ތަހުގީގު ކުރަން ފަށައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ހުޅަނގު ޑަސެލްޑޯފްގައި ހިންގަމުން އަންނަ ޕިއްޒޭރިއާގެ މެނޫގެ 40 ވަނަ އައިޓަމްގައި ހިމަނާފައި ޕިއްޒާ އެކު ކަސްޓަމަރުންނަށް ފޯރުކޮށް ދެނީ ކޮކެއިން އާއި ކެނަބިހެވެ. މި މައްސަލަ އެންމެ ފުރަތަމަ ފާހަގަކުރެވުނީ މި އަހަރުގެ މާޗް މަހުގެ ތެރޭގައި ކުރިއަށް ގެންދިޔަ އިންސްޕެކްޝަނެއްގެ ތެރޭގައި ކަމަށް ޑަސެލްޑޯގެ އޮފިޝަލުންނާ ހަވާލާދީ މީޑިއާތަކުން ބުންޏެވެ.
އެގޮތުން އޭރު ތަނުގެ މެނޭޖަރަކަށް ހުރި 36 އަހަރުގެ މީހާގެ އަތުން ކެނަބިހާއި ކޮކެއިންގެ 1.5 ކިލޯގެ އިތުރުން 289،000 ޑޮލަރު ވެސް ފެނިފައިވެ އެވެ. މިކަމާ ގުޅިގެން އޭނަ ހައްޔަރުކުރި ނަމަވެސް ފަހުން ދޫކޮށްލުމުން އަނެއްކާ ވެސް ކުރިއެކޭ އެއްގޮތަށް ޕިއްޒާއެކު މަސްތުވާތަކެތީ ވިއްކާކަން ފާހަގަވެގެން އެތަން އަލުން ރެއިޑްކުރީ މިދިޔަ ހޯމަ ދުވަހު އެވެ.
އަދި އެތަން ރެއިޑްކޮށް ބަލައި ފާސްކުރުމުގެ ތެރޭގައި ވިޔަފާރީގައި އިސްކޮށް އުޅުނު ތިން މީހަކާއި މަސްތުވާތަކެތިގެ ވިޔަފާރިގައި ހިއްސާވާ ކަމަށް ތުހުމަތު ކުރެވޭ އިތުރު 12 މީހެއްގެ ގެ އާއި އެ މީހުންގެ ވިޔަފާރި ހިންގާ ތަންތަން ވެސް ފުލުހުން ވަނީ ރެއިޑްކޮށްފަ އެވެ.
އަދި ޕިއްޒޭރިއާގެ މެނޭޖަރު ގައުމުން ބޭރަށް ފިލަން އުޅެނިކޮށް އޭނަ ވެސް ވަނީ އަތުލައިގެންފަ އެވެ.
ނަމަވެސް މި މީހުންނާ ބެހޭ އިތުރު އެއްވެސް މައުލޫމާތެއް ފުލުހުން ހާމައެއް ނުކުރެ އެވެ. އެކަމަކު މައްސަލަ މިހާރު އަންނަނީ އިތުރަށް ތަހުގީގު ކުރަމުންނެވެ.