މިއަދު ހިތަދޫ ބޮޑުމަގުގައި ހިނގި އެކްސިޑެންޓްގައި ޒަޚަމްވި މީހެއް . ފޮޓޯ: ކިޔުންތެރިއެއް[/caption]މޯލްޑިވްސް އިސްލާމިކް ބޭންކްގެ އައްޑޫ ސިޓީ ބްރާންޗް ކުރިމަތިން ހިތަދޫ ބޮޑު މަގުގައި ނުރައްކާތެރި އެކްސިޑެންޓެއް ހިނގައިފިއެވެ.
އެކްސިޑެންޓް ހިނގި ސަރަހައްދުގައި ހުރި އައްޑޫލައިވް ގެ ނޫސްވެރިޔާ ބުނިގޮތުގައި، މިއެކްސިޑެންޓް ހިނގާފައި ވަނީ ބާރު ސްޕީޑްގައި ދުއްވާފައި ދިޔަ ސައިކަލެއް ކޮންޓްރޯލް ނުކުރެވިގެން ގޮސް ބޮޑު މަގުގައި ފުލުހުން ޖަހާފައި ހުރި ބެރިކޭޑް ތަކުގައި ޖެހިގެން ކަމަށެވެ.
ސައިކަލްގައި ދިޔަ 2 މީހުންގެ ތެރެއިން ފަހަތުގައި އިން މީހާގެ ބޮލަށް ވަރަށް ބޮޑަށް އަނިޔާވެފައިވާއިރު އޭނާ އަށް މިވަގުތު ގެންދަނީ ހިތަދޫ ރީޖަނަލް ހޮސްޕިޓަލްގެ އައިސީޔޫގައި ފަރުވާދެމުންނެވެ.
ހޮސްޕިޓަލުގެ އޮފިޝަލަކު ބުނިގޮތުގައި އެކްސިޑެންޓްވި 2 މީހުންގެ ތެރެއިން އައިސީޔޫގައި ފަރުވާދެމުން ގެންދާ މީހާގެ ހާލު ސީރިއަސް ކަމަށާއި އޭނާގެ ބޮލަށާއި މޫނު މައްޗަށް ވަރަށް ބޮޑަށް އަނިޔާވެފައިވާ ކަމަށެވެ.
މިއެކްސިޑެންޓް ހިނގި ސަރަހައްދުގައި ރޭ ވެސް ވަނީ 2 ސައިކަލް ޖެހި ނުރައްކާތެރި އެކްސިޑެންޓެއް ހިނގާފައެވެ. އެ އެކްސިޑެންޓްގައި ވެސް ސައިކަލަކުން ޖެހި ބެރިކޭޑެއް ވަނީ ފަޅައިގެން ގޮސްފައެވެ. ހިތަދޫގެ ބޮޑު މަގުގެ ބައެއް ސަރަހައްދުތަކުގެ އިތުރުން ލިންކް ރޯޑްގެ ބައެއް ސަރަހައްދުތަކުގައި ވެސް ބާރު ސްޕީޑްގައި ދުއްވުން ހުއްޓުވުމަށް ފުލުހުން ވަނީ ބެރިކޭޑް ޖަހާފައެވެ.
މިމައްސަލަ ހިތަދޫ ޕޮލިސް ސްޓޭޝަނުން މިހާރު ގެންދަނީ ތަޙުޤީގް ކުރަމުންނެވެ.