އައްޑޫގެ ޓޫރިޒަމް ބްރޭންޑް އަންނަ ހުކުރު ދުވަހުގެ ރޭ ލޯންޗްކުރަން ނިންމައިފި އެވެ.
މިކަމަށްޓަކައި ބާއްވާ ހާއްސަ ރަސްމިއްޔާތު އޮންނާނީ ކެނަރީފް ރިސޯޓްގަ އެވެ. މިކަމުގެ ތައްޔާރީތައް ކައުންސިލުން މިހާރު ވަނީ ގާތްގަނޑަކަށްކޮށް ނިންމައިފަ އެވެ.
ވަކި މަންޒިލެއްގެ ގޮތުގައި އައްޑޫގެ ޓޫރިޒަމް ޕްރޮމޯޓްކޮށް، އައްޑޫގައި ޓޫރިޒަމް ދާއިރާ ކުރިއެރުވުމަކީ ކައުންސިލުން މިހާރު ވަރަށް ބޮޑު އިސްކަމެއް ދެމުން އަންނަ ކަމެކެވެ.
އައްޑޫ ޓޫރިޒަމް ބްރޭންޑް ޑިވެލޮޕްކުރުމުގެ މަސައްކަތް ކައުންސިލުންކޮށްފައި ވަނީ ކްރިއޭޓިވް ކްރޫ ކިޔާ ކުންފުންޏަކާ ހަވާލުކޮށްގެންނެވެ.
އައްޑޫ ޓޫރިޒަމް ޕްރޮޑަކްޓް ބްރޭންޑް ލޯންޗްކުރަން ތައްޔާރުވެފައިވާ އިރު، އައްޑޫގެ ޓޫރިޒަމްގެ ތަފާތު މަޝްރޫއުތައް ހިންގަން ރޭވިފައި އެބަހުއްޓެވެ. އޭގެ ތެރޭގައި އައްޑޫގެ ޓޫރިޒަމް ޒޯންތައް ތަރައްގީ ކުރުމާއި އިންޓަގްރޭޓެޑް ޓޫރިޒަމަށް ހަންކެޑެ ތަރައްގީ ކުރުމާއި ޓޫރިޒަމަށް ހާއްސަކޮށްގެން ރަށްތައް ހިއްކާފައިވުމާއި އައްސޭރި ޓޫރިޒަމް މަޝްރޫއެއް ކުރިއަށް ގެންދިއުން ހިމެނެ އެވެ.
އައްޑޫގައި މި ވަގުތު ތިން ރިސޯޓެއް އޮޕަރޭޓް ކުރެ އެވެ. އެއީ ކެނަރީފާއި ސައުތު ޕާމް ރިސޯޓާއި ގަމުގެ އީކްއޭޓަ ވިޖެވެ. އައްޑޫގެ ރިސޯޓްތަކުގެ ތެރެއިން ޝަންގްރިއްލާ ވިލިގިލި ރިސޯޓް އެންޑް ސްޕާ ބަންދުކޮށްފައި އޮންނަތާ ހަތަރު އަހަރެއްހާ ދުވަސްވެފައިވާ އިރު، މި އަހަރުގެ ޑިސެމްބަރުގައި އެތަން އަލުން ހުޅުވޭތޯ މަސައްކަތް ކުރަމުން އަންނަ ކަމަށް ސަރުކާރުން ބުނެފައިވެ އެވެ.
އައްޑު އަކީ ގެސްޓް ހައުސްގެ ވިޔަފާރި ވެސް ހިންގަމުން އަންނަ ތަނެކެވެ.