އަންނަ އަހަރު ރައީސް ޑރ. މުޙައްމަދު މުއިއްޒުގެ މުސާރަ 50 ޕަސެންޓާއި ހަމައަށް ކުޑަކުރައްވަން ނިންމަވައިފި އެވެ.
ރައީސް ވިދާޅުވީ މިއީ އަންނަ އަހަރުގެ ބަޖެޓް ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި އަޅާ ފިޔަވަޅެއްގެ ގޮތުން ކުރާ ކަމެއް ކަމަށެވެ. މި ފިޔަވަޅު އެޅުމަށް ނިންމާފައިވަނީ ކުރިއަށް އޮތް ދެ އަހަރު ދުވަހުގެ މުއްދަތަށެވެ.
ރައީސާއި ނައިބު ރައީސްގެ މުސާރަ އާއި އިނާޔަތްތައް ކަނޑައެޅުމުގެ ގާނޫނު ބުނާގޮތުން ރައީސްގެ މުސާރައަކީ މަހަކު 100،000ރ. އެވެ. އަދި ނައިބު ރަައީސްގެ މުސާރައަކީ މަހަކު 75،000ރ. އެވެ.
މި ފިޔަވަޅުގެ އިތުރުން ވެސް ހަރަދު ކުޑަކުރަން ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް މިރޭ ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
ރައީސް ވަނީ މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާ ވާނެ ކަމަށް ވިދާޅުވެފަ އެވެ.