ސަރުކާރުން ސިޔާސީ މުވައްޒަފުންނަށް މުސާރަ ދޭން އެހެން މުވައްޒަފުން ގުރުބާންކޮށްފައިވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ ސަރުކާރުން އިތުރަށް ނެގި ސިޔާސީ މީހުންނަށް އެކަނިވެސް މަހަކު 50 މިލިއަން ރުފިޔާ ބަޖެޓުން ޚަރަދުކުރާ ކަމަށާއި އަދި އެ މުވައްޒަފުންގެ މުސާރައިން 10 ޕަސެންޓް އުނިކުރި ނަމަވެސް 45 މިލިއަން ރުފިޔާ ބަޖެޓުން ހަރަދުކުރަންޖެހޭނެ ކަމަށެވެ.
"މި ފެންނަނީ އިތުރު ކުރި ސިޔާސީ މަޤާމުތަކަށް މުސާރަ ދޭން ވެގެން ދައުލަތުގެ އެހެން ހުރިހާ މުވައްޒަފުން ޤުރުބާންވާން ޖެހޭތަން،" އަމީރު ވިދާޅުވި އެވެ.
އަމީރު ވިދާޅުވީ މިހާރު މި ފެންނަނީ ވައުދުވި ގޮތާއި ދިމާ އިދިކޮޅަށް ސިޔާސީ މީހުން ހާހުން އިތުރުކޮށް، ޚަރަދުތައް ބޮޑުކޮށް، ސަރުކާރުގެ ފައިނޭންސިން ސްޓްރެޓެޖީ ފެއިލްވެ، މާލީ ކަންތައްތައް މެނޭޖް ނުކުރެވި، އޭގެ ނޭދެވޭ އަސަރު މިހާރު އިޤްތިސާދަށްވެސް ކުރާތަން ކަމަށެވެ.
"ދުނިޔެ އޮތީ އިޤްތިސާދީ ބޮޑު ކާރިސާއެއްގައެއް ނޫން. ކޮވިޑް-19 ފަދަ އާލަމީ ވަބާއެއް އޮތީކީ ނޫން. ބާޒާރުގައި ތެލުގެ އަގު ހުރީ އެވްރެޖްކޮށް ހުންނަ ވަރަށް. މިއަދު މި ފެންނީ ބައެއްގެ ނާޤާބިލްކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިނުގަނެވިގެން އުޅޭތަން،" އަމީރު ވިދާޅުވި އެވެ.
ސަރުކާރުގެ ހަރަދު ކުޑަކުރަންޖެހޭކަން ފާހަގަކުރައްވަމުން އަމީރު ވަނީ ފުރަތަމަ ޖެހެނީ ސަރުކާރަށް އިތުރުކުރި ޚަރަދުތައް ކުޑަކުރަން ކަމަށް ވިދާޅުވެފަ އެވެ.
ހަރަދު ކުޑަކުރަން ކުރިއަށް އޮތް ދެ އަހަރު ދުވަހުގެ މުއްދަތަކަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ރޭ ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
ރައީސް ވަނީ މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާ ވާނެ ކަމަށް ވިދާޅުވެފަ އެވެ.
މީގެއިތުރުން ރައީސް މުއިއްޒުއަށް ލިބިވަޑައިގަންނަވާ މުސާރައިގެ 50 ޕަސަންޓު ދެ އަހަރު ވަންދެން ނުނަގަންވަން ވެސް ވަނީ ނިންމަވާފަ އެވެ.