ސަޕްލިމެންޓަރީ ބަޖެޓް ރައްޔިތުންގެ މަޖިލީހަށް މިއަދު ހުށަހެޅުމަށް ނިންމައިފި އެވެ.
ރައްޔިތުންގެ މަޖިލީހުން އާއްމުކޮށްފައިވާ އެޖެންޑާގައި ބުނާގޮތުން މިއަދު ހެނދުނު 11:00 ޖަހާއިރު އޮންނަ މަޖިލީހުގެ ޖަލްސާގައި އޮންނާނީ ސަޕްލިމެންޓަރީ ބަޖެޓް ހުށަހެޅުމާއި އެ ބަޖެޓާއި ގުޅޭގޮތުން ކުރަންޖެހޭ މަސައްކަތްތައް ކުރިއަށްގެންދިއުމެވެ.
މައުލޫމާތު ލިބިފައިވާ ގޮތުން ސަރުކާރުން ހުށަހެޅުމަށް ނިންމާފައިވަނީ 5.1 ބިލިޔަން ރުފިޔާގެ ސަޕްލިމެންޓަރީ ބަޖެޓެކެވެ.
މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު މޫސާ ޒަމީރު ވިދާޅުވީ ސަޕްލިމެންޓް ބަޖެޓެއް ހުށަަހަޅަންޖެހެނީ ކުރިން މިއަހަރަށް ލަފާކޮށް ހުށަހެޅި ބަޖެޓުގައި ޖަހާފައިވާ އަދަދުތަކަށް ވުރެ ބޮޑެތި އަދަދުތަކުން ބައެއް މަޝްރޫއުތަކަށް ހަރަދުކުރަން ޖެހުމުންނާއި، މިދިޔަ އަހަރުގެ ބަޖެޓުން ނިންމަންޖެހޭ ބައެއް ހަރަދުތައް މިއަހަރުވެސް ނިންމަންޖެހިފައިވުމުން ކަމަށެވެ.
ރައްޔިތުންގެ މަޖިލީހުން ދައުލަތުގެ މިއަހަރުގެ ބަޖެޓުގެ ގޮތުގައި ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.
އެމްޑީޕީގެ ވެރިކަމުގައި މިދިޔަ އަހަރު ވެސް ދައުލަތުގެ ބަޖެޓު ހުސްވެގެން ސަޕްލިމެންޓަރީ ބަޖެޓެއް ހުށަހެޅި އެވެ. އެ ފަހަރު ފާސްކުރީ 6.5 ބިލިއަން ރުފިޔާގެ ސަޕްލިމެންޓަރީ ބަޖެޓެކެވެ.