ހަރަދުތައް ކުޑަކުރަން ރައީސް ޑރ. މުހައްމަދު އެޅުއްވި ފިޔަވަޅުތަކަށް، ސަރުކާރު ހިންގާ ޕީއެންސީން މަރުހަބާ ކިޔައިފި އެވެ.
ހަރަދު ކުޑަކުރަން ކުރިއަށް އޮތް ދެ އަހަރު ދުވަހުގެ މުއްދަތަކަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް މުއިއްޒު ރޭ ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
ރައީސް ވަނީ މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާ ވާނެ ކަމަށް ވިދާޅުވެފަ އެވެ.
މީގެއިތުރުން ރައީސް މުއިއްޒުއަށް ލިބިވަޑައިގަންނަވާ މުސާރައިގެ 50 ޕަސަންޓު ދެ އަހަރު ވަންދެން ނުނަގަންވަން ވެސް ވަނީ ނިންމަވާފަ އެވެ.
މި ފިޔަވަޅުތަކަށް މަރުހަބާ ކިޔައި ޕީއެންސީން ނެރުނު ބަޔާނެއްގައި ބުނީ ރައީސް ނިންމެވި ނިންމެވުމަކީ ހަރުދަނާ އަދި އެހާމެ ހިތްވަރުގަދަ ނިންމެވުންތަކެއް ކަމަށެވެ.
ފާއިތުވެދިޔަ ދެތިން އަހަރު ދައުލަތުގެ ޚަރަދުތައް އިންތިހާއަށް އިތުރުވެ އެކަމުގެ ސަބަބުން ލިބޭ އާމްދަނީއާއި ކުރާ ހޭދައިގެ ފަރަގު ބޮޑުވަމުން ދިޔައިރު، އެކަން އިޞްލާޙުކުރުމަށްޓަކައި ޚަރަދުތައް ކޮންޓްރޯލުކުރުމަށް ދުނިޔޭގެ މާލީ އިދާރާތަކާއި ރާއްޖޭގެ ކްރެޑިޓް ރޭޓިން އެޖެންސީތަކުން ދެމުންދިޔަ ލަފައަށް ކުރީ ސަރުކާރުން ދިނީ ބީރު ކަންފަތެއް ކަމަށް ޕީއެންސީން ބުނެ އެވެ.
ދައުލަތުގެ ޚަރަދުތައް ކުޑަކުރުމަށް ހަރުދަނާ އެއްވެސް ފިޔަވަޅެއް ކުރީ ސަރުކާރުން އަޅާފައި ނުވާ ކަމަށާއި ރައީސް މުޢިއްޒު އެފިޔަވަޅުތައް ފެއްޓެވީ ސީދާ އެމަނިކުފާނާ ހަމައިންކަން ފާހަގަކުރަމުން އެ ބަޔާނުގައި ވަނީ އަމިއްލަފުޅު މުސާރައިގެ ދެބައިކުޅަ އެއްބައި ނުނަންގަވަން ރައީސް ނިންމަވާފައިވާ އިރު، އެއަށްފަހު ސިޔާސީ މުވައްޒަފުންނާއި ދައުލަތުގެ މުއައްސަސާތަކުގެ ވެރިންނާއި މަޖިލީހުގެ މެންބަރުންގެ މުސާރަތައް ކުޑަކުރައްވަން ހުށަހަޅާފައިވާ ކަމަށް ބުނެފަ އެވެ.
މިއީ މިވަގުތު ދިވެހި ދައުލަތުގެ އެންމެ އިސްވެރިޔާގެ ހައިސިއްޔަތުން ދިވެހި މާލިއްޔަތުގެ ދެމެހެއްޓެނެވިކަން ޔަޤީންކޮށްދެއްވުމަށް ރައީސް އަޅުއްވަން ނިންމެވި ހަރުދަނާ ފިޔަވަޅުތަކެއް ކަމަށާއި ސިޔާސީ ގޮތުން އުނދަގޫ އެހެންނަމަވެސް ޤައުމުގެ ޙައްޤުގައި ނިންމަވަންޖެހޭ ނިންމެވުމެއް ކަމަށްވެސް ބުނެފައިވެ އެވެ.