ރަފީނިއާގެ ހެޓްރިކުން ބާސާއިން ބަޔާން ބަލިކޮށްފި

ޗެމްޕިއަންސް ލީގުގައި ރޭ ބާސެލޯނާ އިން 4-1 އިން ބަޔާން މިއުނިކް ބަލިކޮށްފި އެވެ.

އަމިއްލަ ދަނޑުގައި ކުޅުނު މި މެޗުގެ ފުރަތަމަ މިނެޓްގައި ރަފީނިއާ ވަނީ ބާސާ އަށް ލީޑު ނަގައިދީފަ އެވެ. ނަމަވެސް މެޗުގެ 18 ވަނަ މިނެޓްގައި ހެރީ ކޭން ވަނީ ބަޔާނަށް ނަތީޖާ އެއްވަރުކޮށްދީފަ އެވެ.

ފުރަތަމަ ހާފް ނިމުމުގެ ކުރިން ބާސާއިން ވަނީ ދެ ގޯލު ކާމިޔާބުކޮށް ލީޑު ފުޅާކޮށްފަ އެވެ. އެގޮތުން މެޗުގެ 36 ވަނަ މިނެޓްގައި ބާސާގެ ދެވަނަ ގޯލު ކާމިޔާބުކޮށްދިނީ ބަޔާނަށް ކުރިން ކުޅުނު ފޯވާޑް ރޮބަޓް ލެވެންޑޯސްކީ އެވެ. އަދި ފުރަތަމަ ހާފްގެ ފަހު ވަގުތުކޮޅުތެރޭ ރަފީނިއާ ވަނީ ބާސާގެ ތިންވަނަ ގޯލު ކާމިޔާބުކޮށްދީފަ އެވެ.

އަދި ބާސާގެ ހަތަރުވަނަ ގޯލު މެޗުގެ 56 ވަނަ މިނެޓްގައި ކާމިޔާބުކޮށްދީ، ރަފީނިއާ ވަނީ އޭނާގެ ހެޓްރިކް ފުރިހަމަކޮށްފަ އެވެ. މި ގޯލަށް ފަހު ވެސް ބާސާ އަށް މި ހާފުގައި ވަނީ ގޯލްޖަހާނެ އިތުރު ފުރުސަތުތަކެއް ލިބިފަ އެވެ.

ޗެމްޕިއަންސް ލީގުގައި ރޭ ކުޅުނު އެހެން މެޗުތަކަށް ބަލާއިރު، މެންޗެސްޓާ ސިޓީން ވަނީ ސްޕާޓާ ޕްރާގާ 5-0 އިން ބަލިކޮށްފަ އެވެ. ލިވަޕޫލުން ރަށުން ބޭރުގައި ރެޑްބުލް ލީޕްޒިގް 1-0 އިން ބަލިކުރިއިރު، އިންޓަ މިލާނުން ވަނީ 1-0 އިން ޔަންގް ބޯއީސް ބަލިކޮށްފަ އެވެ. އަދި ފްރާންސްގެ ލިލް އިން ވަނީ އެތްލެޓިކޯ މެޑްރިޑްގެ މައްޗަށް 3-1 އިން ކުރި ހޯދާފަ އެވެ.