މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ އަށް ސީއީއޯއެއް ހޯދަން އިއުލާންކޮށްފި އެވެ.
ފަސް އަހަރު ދުވަހުގެ އެ މަގާމަށް ކުރިމަތިލުމުގެ ޝަރުތުތަކުގެ ތެރޭގައި ބިޒްނަސްގެ ދާއިރާއިން މާސްޓަސް ހާސިލްކޮށްފައިވުމާ އެކު މަދުވެގެން 10 އަހަރު ފައިނޭންޝިއަލް ދާއިރާގެ ތަޖުރިބާ ހުރުން ހިމެނެ އެވެ.
މަގާމަށް ކުރިމަތިލުމުގެ ފުރުސަތު ހުޅުވާލާފައި ވަނީ އަންނަ މަހުގެ 5 އާ ހަމައަށެވެ. ނަމަވެސް މަގާމުގެ މުސާރައެއް ހާމައެއްނުކުރެ އެވެ.
ރައީސް ޑރ. މުހައްމަދު މުއިއްޒު މޯލްޑިވްސް އިންޓަނޭޝަނަލް ފައިނޭންޝަލް ސާސަސް އޮތޯރިޓީ އުފެއްދެވީ މި އަހަރުގެ ޖެނުއަރީމަހު އެވެ.
އިކޮނޮމިކް މިނިސްޓްރީގެ ދަށުން ހިންގާނެ އިދާރާއެއްގެ ގޮތުގައި ފައިނޭންޝަލް އޮތޯރިޓީ އުފެއްދުމުގެ މައިގަނޑު ބޭނުމަކީ ރާއްޖޭގެ ސްޕެޝަލް އިކޮނޮމިކް ޒޯން ގާނޫނުގައި ބަޔާންވެފައިވާ އޮފްޝޯ އަދި އޮންޝޯ ފައިނޭންސިން ޚިދުމަތްތަކާއި އޮންޝޯ އަދި އޮފްޝޯ ޑިވެލޮޕްމެންޓް ބޭންކިން ޚިދުމަތް ގާއިމުކުރުމެވެ.
ފައިނޭންސް އޮތޯރިޓީގެ ޗެއާޕާސަނަކީ ކުރީގެ ނައިބު ރައީސް އަބްދުﷲ ޖިހާދެވެ.