މަޝްހޫރު ތެލެގޫ އެކްޓަރު ޕްރަބާސްގެ ރޮމޭންޓިކް ކޮމެޑީ ހޮރޯ "ރާޖާސާބު" އަންނަ އަހަރުގެ އެޕްރީލް 10 ގައި ސިނަމާތަކަށް ގެންނަން ނިންމައި، ފިލްމުގެ ޕޯސްޓަރެއް ވެސް ދައްކާލައިފި އެވެ.
މީގެ ކުރިން ގިނަ ފިލްމުތަކެއްގައި ވަރުގަދަ އެކްޝަން ރޯލެއް ކުޅެފައިވާ އެކްޓަރު މި ފިލްމުގައި ފެންނާނީ ވަރަށް ތަފާތު ރޯލަަކުންނެވެ. "ރާޖާސާބް" ގެ ޕޯސްޓަރުން ވެސް ޕްރަބާސްގެ ކެރެކްޓާ ވަރަށް ތަފާތުވާނެކަން އެނގެ އެވެ.
މި ފިލްމަކީ މަރޫތީ ލިޔެ ޑައިރެކްޓްކޮށްފައިވާ ފިލްމެކެވެ.
"ރާޖާސާބް" ގެ ކާސްޓްގައި ދާދި ފަހުން ރިލީޒްކުރި ބޮލީވުޑްގެ ފިލްމު "ޔުދުރާ" ގެ ބަތަލާ މަލްކިވާ މޯހަނާއި ނިދީ އަގްރަވާލް އާއި ސަންޖޭ ދަތާއި އަނޫޕަމް ކޭރާއި ރިދީ ކަޕޫރާއި ޖިއްޝޫ ސެންގުޕްތާ އާއި މުރަލި ޝަރުމާގެ އިތުރުން ޔޯގީ ބާބޫ ހިމެނެ އެވެ.
""ބާހްބަލީ" ކުޅެގެން ބޮޑު މަޝްހޫރުކަމެއް ހޯދި ޕްރަބާސްގެ އެންމެ ފަހުގެ ފިލްމަކީ މި އަހަރުގެ ޖޫންގައި ރިލީޒްކުރި ސައިންސް ފިކްޝަން ފިލްމު "ކަލްކީ 2898 އޭޑީ" އެވެ.
އޭނަގެ އާ ފިލްމު ގެނެސްދޭ ތާރީހު އިއުލާންކުރި އިރު، ޕްރަބާސް މިހާރު އަންނަނީ މިދިޔަ އަހަދު ރިލީޒްކުރި އެކްޝަން ތުރިލާ "ސަލާރު" ގެ ދެވަނަ ބައިގެ މަސައްކަތް ކުރަމުންނެވެ.