އަންނަ އަހަރަކީ "ވިޒިޓް ދަރަވަންދޫ" ގެ ގޮތުގައި ފާހަގަކުރަން ނިންމި އަހަރަށްވާތީ އެކަން އިފުތިތާހު ކުރަން މިރޭ ހާއްސަ ހަފުލާއެއް ބާއްވަން އެ ރަށު ކައުންސިލުން ތައްޔާރުވެއްޖެ އެވެ.
ހަފުލާ ފަށަން ހަމަޖެހިފައި ވަނީ މިރޭ 9:00 ގަ އެވެ.
ކައުންސިލުން އެކުލަވާލި ދަރަވަންދޫގެ 2022-2026 ތަރައްގީގެ ޕްލޭންގައި ރަށުގެ ޓޫރިޒަމަށް ސަމާލުކަން ދީގެން ހިމަނާފައިވާ ކަންތައްތަކުގެ ތެރެއިން އަންނަ އަހަރަކީ ދަރަވަންދޫ މަންޒިލެއްގެ ގޮތުގައި އިޝްތިހާރުކޮށް، އެ އަހަރުގެރަށަށް ޒިޔާރަތްކުރާ މީހުން އިތުރު ކުރަން ނިންމި އަހަރެކެވެ.
އެހެންވެ މި ރެއަކީ ރަސްމީކޮށް އެކަން އިފުތިތާހު ކުރަން ނިންމި ރެ އެވެ. އެގޮތުން "ވިޒިޓް ދަރަވަންދޫ" އިފުތިތާހު ކުރަން ގިނަ ހަރަހަކާތްތަކަކާ އެކީ ކުލަގަދަ އިވެންޓެއް ބާއްވާނެ އެވެ.
މިހާރު 1،222 މީހުންގެ އާބާދީއެއް އޮތް ދަރަވަންދު އަކީ ރަށުގައި ލޯކަލް ޓޫރިޒަމް ކުރިއަރުވަން މިހާރު ގިނަ މަސައްކަތްތަކެއް ކުރެވެމިން އަންނަ ބ. އަތޮޅުގެ އެންމެ ފާހަގަކޮށްލެވޭ އެއް ރަށެވެ. އެ އަތޮޅުގެ އެއާޕޯޓް ވެސް އޮންނަނީ ދަރަވަންދޫގަ އެވެ.
ދަރަވަންދޫގައި މިހާރު 14 ގެސްޓްހައުސް އާއި ތިން ޑައިވް ސެންޓަރު ހިންގަމުން އަންނަ އިރު، ބ. އަތޮޅަކީ 15 ރިސޯޓް ވެސް އޮތް އަތޮޅެކެވެ.