ތުރުކީ އަށް އިއްޔެ ދިން ޓެރަރިސްޓް ހަމަލާއާ ގުޅިގެން އެ ގައުމުން ރައްދު ހަމަލާތަކެއް ރޭ ދީފި އެވެ.
ތުރުކީގެ އަސްކަރިއްޔާ އިން ބުނީ ވެރިރަށް، އަންކާރާގެ ކައިރީގައި ހުންނަ ޓާކިޝް އޭރޯސްޕޭސް އިންޑަސްޓްރީޒްގެ މައި މަރުކަޒަށް އަމާޒުކޮށް ހަމަލާ ދިނީ ކުރުދީންގެ ހަނގުރާމަވެރިންގެ ޖަމާއަތެއް ކަމަށްވާ ކުރްދިސްތާން ވޯކާސް ޕާޓީ (ޕީކޭކޭ) އިން ކަމަށެވެ. އެހެންވެ ރައްދުގައި އިރާގާއި ސީރިއާގައި ސަރަހައްދުގައި ހުރި އެ ޖަމާއަތުގެ ސައިޓްތަކަށް ރައްދު ހަމަލާތަކެއް ދީފައިވާ ކަމަށް ތުރުކީން ބުންޏެވެ.
ހަތިޔާރު އެޅި ދެ މީހަކު އިސްކޮށް ތިބެގެން ތުރުކީ އަށް ދިން ހަމަލާގައި އެކަކު މަރުވެ، 22 މީހަކު ޒަހަމްވެފައިވެ އެވެ.
ތުރުކީގެ ޑިފެންސް މިނިސްޓްރީން ނެރުނު ބަޔާނެއްގައި ބުނީ އިއްޔެގެ ހަމަލާ އަކީ 23 ތަނަކަށް ޓެރަރިސްޓް ހަމަލާތަކެއް ދޭން ރާވައިގެން ދިން ހަމަލާތަކެއްގެ ތެރެއިން ހަމަލާއެއް ކަމަށާއި އިތުރު ހަމަލާތައް ފެއިލްކޮށްލާފައިވާ ކަމަށެވެ. އަދި ހަމަލާދިން ދެ މީހަކު ތުރުކީން ވަނީ މަރާލައިފަ އެވެ.
ނަމަވެސް ތުރުކީ އަށް ދިން ހަމަލާގެ ޒިންމާ މިހާތަނަށް އެއްވެސް ބަޔަކު ނަގައިފައެއް ނުވެ އެވެ.