އަންހެން އިލެކްޓްރިޝަނުން ތަމްރީނު ކުރަން ނިންމައި ސްޓެލްކޯ އިން ޕްރޮގްރާމެއްގައި ބައިވެރިވާން ހުޅުވާލައިފި އެވެ.
އުމުރުން 16 އަހަރުން މަތީގެ އަންހެނުންނަށް ހާއްސަކޮށްގެން މާލޭގައި ހިލޭ ކުރިއަށް ގެންދަން ނިންމާފައިވާ މި ތަމްރީނު ޕްރޮގްރާމްގައި ބައިވެރިވާން ބޭނުންވާ އަންހެނުންނަށް އެޕްލައި ކުރުމުގެ ފުރުސަތު އަންނަ މަހުގެ 4 އާ ހަމައަށް ވަނީ ހުޅުވާލައިފަ އެވެ.
ސްޓެލްކޯ އިން ބުނީ މިއީ އިލެކްޓްރިކަލް ދާއިރާއަށް އަންހެނުން ޝައުގުވެރިކުރުވައި، އެ ދާއިރާގައި ފިރިހެނުންނާއި އެއް ހަމައެއްގައި މަސައްކަތް ކުރުމުގެ ފުރުސަތު ފަހިކޮށް ދިނުމަށްޓަކައި ކުރިއަށް ގެންދަން ނިންމި 'ބިގިނާސް އިލެކްޓްރީޝަން ކޯސް ފޯ ވިމެން' ކަމަށެވެ.
މީގައި ކަރަންޓާ ގުޅޭ އަސާސީ ކަންކަން ކިޔަވައި ދޭނެ އެވެ.
ކޯހުގައި ރައްކާތެރި ގޮތުގައި ކަރަންޓު ބޭނުން ކުރުމާއި، ކަރަންޓަށް ކުރާ ޚަރަދު ކުޑަ ކުރުމުގެ އިތުރުން، ކަރަންޓު ވައިރިން ކުރުމުގެ އަސާސީ މަޢުލޫމާތު ބައިވެރިންނަށް ކިޔައި ދޭނެ އެވެ.
މި ފަހަކަށް އައިސް ފެނަކަ އިން ވެސް އަންނަނީ ކަރަންޓާ ގުޅޭ އަސާސީ ކަންކަން އަންހެނުންނަށް ދަސްކޮށް ދޭން ރާއްޖޭގެ އެކި ހިސާބުތަކުގައި ޓްރެއިނިން ޕްރޮގްރާމްތަކެއް ބާއްވަމުންނެވެ.