ބޮލީވުޑްގެ ދެމަފިރިން ކަމަށްވާ އަބީޝެކް ބައްޗަނާއި އައިޝްވާރިއާ ރާއީގެ ވަރީގެ ވާހަކަ އަކީ މި ފަހުން މީޑިއާތަކުގައި މިހާރު އެންމެ ގަދައަށް ދެކެވެމުން އަންނަ އެއް ވާހަކަ އެވެ. ބައެއް މީޑިއާތަކުން ބުނާ ގޮތުގައި އެ މީހުން ވަނީ ރޫޅާލައިފަ އެވެ. އަދި ބައެއް މީޑިއާތަކުން ބުނާ ގޮތުން ދެ ތަރިންގެ ކައިވެނި އޮތީ ވަރީގެ ތުންފަތްމަތީގަ އެވެ.
އެކަމަކު މީޑިއާތަކުގައި ދެކެވެމުން އަންނަ މި ވާހަކަތަކާ ބެހޭ ގޮތުން ސީދާ އަބީޝެކާއި އައިޝްވާރިއާ ވެސް މިހާތަނަށް އެއްވެސް ވާހަކައެއް ނުދައްކަ އެވެ. ހަގަގީތަކީ ކުރިން އަބީޝެކާ އެކު އޭނަގެ އާއިލާގެ ގާތުގައި އުޅެމުން ދިޔަ އައިޝްވާރިއާ އެ ގެއިން ނުކުމެ އޭނަގެ މަންމަ ކައިރީ، ދަރިފުޅު އަރާދިއާ ބައްޗަނާ އެކީ މިހާރު އުޅެމުން އަންނަކަމެވެ.
ބައެއް ރިޕޯޓްތައް ބުނާ ގޮތުން އަބީޝެކާއި އައިޝްވާރިއާގެ ގުޅުމުގައި ކުނި ޖެހުމުގެ އެއް ސަބަބަކީ ބަތަލާ ނިމްރަތު ކޯރެވެ. އޭނަ އަކީ އަބީޝެކްގެ 2022 ގެ ފިލްމު "ދާސްވީ" ގައި އޭނަގެ އަންހެނުންގެ ރޯލު ކުޅުނު ބަތަލާ އެވެ. ބައެއް ރިޕޯޓްތައް ބުނާ ގޮތުން އަބީޝެކާއި ނިިމްރަތާ މެދު ހާއްސަ ގުޅުމެއް އުފެދުނީ އެ ފިލްމުގެ މަސައްކަތުގެ ތެރޭގަ އެވެ.
އޭ ގެ ފަހުން އެ ގުޅުން އެކުވެރިކަމުގެ ގުޅުމުގެ ރޮނގު ހުރަސްކޮށްފައިވާ ކަމަށްވެ އެވެ. އަދި އެ "ހާއްސަ" ގުޅުން އައިޝްވާރިއާ އަށް ފަޅާއެރުމުން އަބީޝެކާއި އޭނައާ ދެމެދު ކުރިން އޮތް ގާތް ކަމަށް ބުރޫ އެރީ އެވެ.
މިފަދަ އެތައް ވާހަކައެއް ތުންތުންމަތިން ވެސް ދެކެވެމުން އަންނަ އިރު، ނިމްރަތު ވެސް ހުރީ ހިމޭނުންނެވެ. އޭނަ އާއި އަބީޝެކް އަޅުވާ ކިޔައި ދެކެވެމުން އަންނަ އެއްވެސް ވާހަކައަކަށް ރައްދެއް ނުދެ އެވެ.
އަނެއްކޮޅުން ވަރަށް ގިނަ ބަޔަކު މިހާރު އަންނަނީ ސޯޝަލް މީޑިއާގައި އަބީޝެކަށް ވަރަށް ބޮޑަށް މަލާމާތް ވެސް ކުރަމުންނެވެ. އެގޮތުން އޭނަ މިހާރު "ފެރާރީ" ދޫކޮށްލައި "ޓޮޔޮޓޯ" އަކަށް ހިތްކިޔައިގެން އުޅޭ ކަމަށް ދަނީ ޖޯކް ވެސް ޖަހަމުންނެވެ.
އައިޝްވާރި އާއި އަބީޝެކް ކައިވެނިކުރީ 2007 ގަ އެވެ. އެ މީހުންގެ ދަރިފުޅު އާރަދިއާ އަށް މިހާރު 13 އަހަރެވެ.