ރައްޔިތުންގެ މަޖިލީހަށް މިއަދު ހުށަހެޅި ސްޕަލިމެންޓަރީ ބަޖެޓް ދިރާސާ ކުރާ ކޮމިޓީން އެއް ދުވަސްތެރޭ ބަޖެޓް ދިރާސާކޮށް ނިންމުމަށް މަޖިލީހުން ފާސްކޮށްފި އެވެ.
މިގޮތަށް ފާސްކޮށްފައިވަނީ ވޯޓުގައި ބައިވެރިވި 69 މެންބަރުންގެ އިއްތިފާގުންނެވެ.
ސަޕްލިމެންޓަރީ ބަޖެޓްގެ މަސައްކަތް ކުރިއަށް ގެންދާނެ ގޮތަކާއި ގުޅޭގޮތުން ހުށަހެޅުމުގެ ފުރުސަތު ރިޔާސަތުން ހުޅުވާލުމުން މަޖިލީހުގެ މެޖޯރިޓީ ލީޑަރު އިބްރާހިމް ފަލާހް ވަނީ، މިއަދުގެ 1:30 އިން ފެށިގެން ބަޖެޓް ބަހުސް ކުރިއަށް ގެންދިއުމަށް ހުށަހަޅުއްވާފަ އެވެ. އަދި އަދި ބަޖެޓް ބަހުސްގައި ކޮންމެ މެންބަރަކަށް 5 މިނެޓްގެ ފުރުސަތެއް އަދި ކޮމިޓީ ރިޕޯޓަށް ބަހުސް ކުރުމަށް ކޮންމެ މެންބަރަކަށް 2 މިނެޓްގެ ފުރުސަތެއް ދިނުމަށް ހުށަހެޅުއްވި އެވެ.
ސަޕްލިމެންޓަރީ ބަޖެޓް މަސައްކަތް އަވަސް ކުރުމަށް ބަޖެޓް ކޮމިޓީއަށް މަސައްކަތް ނިންމުމަށް އެއް ދުވަހުގެ ފުރުސަތެއް ދިނުމަށްވެސް ފަލާހު ހުށަހެޅުއްވި އެވެ. މިގޮތަށް ފާސްކުރުމަށް އެމްޑީޕީންވެސް ތާއީދު ކޮށްފައިވެ އެވެ.
ސަޕްލިމެންޓަރީ ބަޖެޓްގެ ގޮތުގައި މަޖިލީހަށް ހުށަހަޅާފައިވަނީ 5.1 ބިލިއަން ރުފިޔާ އެވެ.