މިސަރުކާރުގެ ސިޔާސީ މުވައްޒަފުންގެ އަދަދު ހާމަކުރުމަށް ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަނެ ބޭރު ކޮށްލައިފި އެވެ.
މި ކުއްލި މައްސަލަ މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އެވެ. މި ކުއްލި މައްސަލަ ބަލައިގަންނަން ފެންނަ ކަމަށް 8 މެންބަރުން ވޯޓު ދެއްވިއިރު ކުއްލި މައްސަލަ ބަލައިގަތުމާ ދެކޮޅަށް 59 މެންބަރުންނެވެ.
މީކާއިލް ހުށަހެޅި ކުއްލި މައްސަލައިގައި ބުނެފައިވަނީ، ހަރަދުތައް ކުޑަކުރުމަށް މުއައްސަސާތަކާ ސަރުކާރު ހިއްސާވާ ކުންފުނިތަކުގައި ހިމެނޭ ފަރާތްތަކުގެ މުސާރަ ކުޑަކުރުމަށް އިއުލާނު ކޮށްފައިވާއިރު، ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ފަރާތްތަކުގެ އަދަދާއި އެ ފަރާތްތަކުގެ މަގާމުގެ މަސްއޫލިއްޔަތު ހާމަ ކޮށްދިނުމަށް ރައީސުލްޖުމްހޫރިއްޔާ އާއި ސަރުކާރަށް ގޮވައިލާ ކަމަށެވެ.
މިސަރުކާރުން ވެރިކަމަށް އައިސްފައިވަނީ ސިޔާސީ މަގާމުތަކުގެ އަދަދު 700 އަށްވުރެ އިތުރު ނުކުރާނެ ކަމަށް ވައުދުވެގެންނެވެ. އެހެންނަމަވެސް މިސަރުކާރުގެ ސިޔާސީ މަގާމުތަކުގެ އަދަދު 2000 އިން މައްޗަށް އަރާފައިވާ ކަމަށް ބައެއް ފަރާތްތަކުން ތުހުމަތު ކުރެ އެވެ.