ރައީސް އޮފީހުގެ ޑެސްކަކަށް ރައްޔިތުންގެ މަޖިލިސް ބަދަލުވެފައިވާ ކަމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެ އެވެ.
ސަރުކާރުން މިއަދު މަޖިލީހަށް ހުށަހެޅި ސަޕްލިމެންޓްރީ ބަޖެޓަށް ބަހުސް ކުރައްވަމުން މީކާއިލް ވިދާޅުވީ 20 ވަނަ މަޖިލިސް ފެނިގެން ދަނީ ރައީސް ޑރ. މުހައްމަދު އެންގެވިހާ ގޮތަކަށް އޮޕަރޭޓް ކުރަމުންދާތަން ކަމަށާއި މަޖިލީހުގެ ކޮމިޓީތަކުން ނިންމާ ނިންމުންތައް ވެސް ރައީސް ވިދާޅުވެގެން ބަދަލުކުރަމުންދާ ކަމަށެވެ.
އެފަދަ ކަންކަމުން މަޖިލިސް މިހާރު ކުޑަވެފައިވާ މިންވަރު ހާމަވާ ކަމަށާއި ރައީސް އޮފީހުގެ ޑެސްކަކަށް މަޖިލިސް މިހާރު ބަދަލުކޮށްލާފައިވާ ކަމަށް މީކާއިލް ވިދާޅުވި އެވެ.
"ރައީސުލްޖުމްހޫރިއްޔާގެ އޮފީހުގެ ޑެސްކަކަށް މި ރައްޔިތުންގެ މަޖިލީސް ބަދަލުވެފައިވާ މަންޒަރު އެބަ ފެނިގެންދޭ،" މީކާއިލް ވިދާޅުވި އެވެ.
ސަރުކާރުން ނިންމާ ނިންމުންތައް 24 ގަޑިއިރު ނުވެ ބަދަލުވާ މަންޒަރު ވެސް ފެންނަމުންދާ ކަމަށާއި މިއީ ހިތާމަހުރި ކަމެއް ކަމަށް މީކާއިލް ވިދާޅުވި އެވެ. އަދި ސަޕްލިމެންޓްރީ ބަޖެޓެއް ހުށަހެޅުނުއިރު މާލީ ނިޒާމަށް އޮތް އިތުބާރު ގެއްލޭ ގޮތަށް ސަރުކާރުގެ އިސްވެރިން އަމަލުކުރަމުންދިޔުމަކީ ވެސް ހިތާމަ ހުރި ކަމެއް ކަމަށާއި މީގެ ގެއްލުން ވާނީ މުޅި ގައުމަށް ކަމަށްވެސް އޭނާ ވިދާޅުވި އެވެ.
ރައްޔިތުންގެ މަޖިލީހަކީ ރައްޔިތުންގެ ވަކާލާތު ކުރެވޭ ތަނަކަށް އަލުން ވެގެންދިޔުމަކީ އުއްމީދެއް ކަމަށާއި މީގެކުރިން އެމްޑީޕީ އަށް މަޖިލީހުގައި މެޖޯރިޓީ އޮތްއިރު ކަންކަން ކުރީ ދެފުށް ފެންނަ ގޮތަކަށް ކަމަށްވެސް މީކާއިލް ވިދާޅުވި އެވެ.