ކުރީގެ ޑިފެންސް މިނިސްޓަރު މުހައްމަދު ނާޒިމްގެ ޝަރީއަތް ދަށު ކޯޓުގައި ހިންގިއިރު ދަޢުލަތުގެ ފަރާތުން ހުށަހެޅި ހެކިންގެ ހެކިބަހުގައި ފުށުއެރުންތަކެއް ހުރިކަމަށް ދަޢުލަތުން ހައިކޯޓްގައި އިއުތިރާފްވެއްޖެއެވެ.
ހަނގުރާމަވެރި ހަތިޔާރު ގެންގުޅުމުގެ ކުށުގައި ނާޒިމަށް އިއްވި ޖަލު ހުކުމް ނާޒިމްގެ ފަރާތުން އިސްތިއުނާފް ކުރުމުން މިއަދު ބޭއްވި ދެވަނަ އަޑުއެހުމުގައި ދައުލަތުގެ ވަކީލް އާދަމް އާރިފް ބުނެފައިވަނީ، އެ މައްސަލައިގައި ހެކިބަސްދިން ހެކިންގެ ހެކިބަހުގައި ފުށުއެރުންތަކެއް ހުރި ނަމަވެސް އެއީ އެ މައްސަލައިގެ ނަތީޖާއަށް އަސަރުކުރާނެ ކަމެއް ނޫން ކަމަށާއި އެ ހެކިންނަކީ ހެކިވެރިންގެ ކިބައިގައި ފުރިހަމަވާންޖެހޭ ޝަރުތުތައް ފުރިހަމަވެފައިވާ ހެކިން ކަމަށާއި އޭގެ ތެރެއިން ބައެއް ހެކިން ސިއްރުކޮށްފައިވާއިރު އެކަން އެގޮތަށް ކުރެވިދާނެ ކަމަށް ހައި ކޯޓުން ކުރިން ކަނޑައަޅާފައިވާ ކަމަށެވެ.
ދަށު ކޯޓުގެ ފަނޑިޔާރުން ޝަރީއަތް ކުރިއަށް ގެންދެވިއިރު އިޖްރާއަތާ ޚިލާފް އެއްވެސް ކަމެއް ހިންގާފައިނުވާކަން ފާހަގަކުރައްވައި އާރިފް ވިދާޅުވި ގޮތުގައި ދަށު ކޯޓުގެ ފަނޑިޔާރުން ޝަރީއަތް ހިންގީ ހުކުމް ލިޔުމަށް ފަހު ކަމަށް ނާޒިމްގެ ވަކީލުން ބުނި ނަމަވެސް އެކަން އެގޮތަށް ކޮށްފައިވާ ކަމަށް ބެލެވެން ނެތް ކަމަށެވެ.
ދައުލަތުން މިއަދުގެ އަޑުއެހުމުގައި ފާހަގަކުރި ކަންކަން:
– ފުލުހުން އަމަލް ކުރަންޖެހޭ ސްޓޭންޑާޑް އޮފް އޮޕަރޭޝަން އަކީ ފުލުހުން އޮޕަރޭޝަންތަކުގައި އަމަލްކުރަން މަޖުބޫރު އެއްޗެއް ކަމަށް ނާޒިމް އަށް ސާބިތުކޮށްދެވިފައި ނުވާތީ އެއީ އޮޕަރޭޝަންސް ތައް ހިންގަން ޖެހޭނެ އުސޫލްތައް ނޫން.
– ދަންވަރާ ބަންދު ދުވަސް ދުވަހާއި ދުވާލަކު ދެ ޝަރީޢަތް ބޭއްވި ކަމުގައި ވިޔަސް އެއީ ތަފާތު ކުރުން ކަމަށް ނުބެލެވޭނެ.
– ދިފާޢީ ހެކިންގެ ގޮތުގައި ހުށަހެޅި ހުރިހާ ފަރާތްތަކަށް ފުރުސަތު ދޭން ނުޖެހޭނެ، ކްރިމިނަލް ކޯޓުގެ ފަނޑިޔާރުން ފުރުސަތު ދީފައިވަނީ ރަނގަޅަށް
– ހެކިންނަށް ނުފޫޒު ފޯރުވުމުގެ އަމަލެއް ހިންގާފައިވާކަން އެނގޭކަށް ނެތް
ހަމަހަމަކަމުގެ އުސޫލާއި ޚިލާފަށް ނާޒިމްގެ މައްޗަށް ދައުވާކޮށްފައިވާ ކަމަށް ބުނެ ނާޒިމްގެ ވަކީލުން ހުށަހަޅާފައިވާ ނުކުތާއަށް ރައްދު ދެއްވައި ދައުލަތުގެ ވަކީލް އާރިފް ވިދާޅުވީ ދައުވާ ކުރުމާއި ނުކުރުމަކީ ޕްރޮސެކިއުޓާ ޖެނެރަލަށް ލިބިގެންވާ ބާރެއް ކަމަށެވެ. އަދި ނާޒިމަށް ދައުވާ ކުރުމަށް ފަހު އޭނާގެ އަނބިކަނބަލުން އަފާފް އަބްދުލްމަޖީދުގެ މައްޗަށް ކުރި އަނބުރާ ގެންދިޔައީ އެ ދެ މީހުންނަކީ އެއް ހާލަތެއްގައި ތިބި ދެ މީހުން ކަމަށް ނުވާތީ ތަފާތު ކަމެއް ހުރި ބައެއްގެ މެދުގައި ހަމަހަމަކަން ގާއިމް ކުރުމުގެ ގޮތުން ކަމަށެވެ.
ގަޑިއެއްހާއިރަށް ދިގުދެމިގެންދިޔަ ދައުލަތުގެ ޖަވާބު އިއްވުން ނިންމާލަމުން ދައުލަތުގެ ވަކީލު ވަނީ ދަށު ކޯޓުގެ ހުކުމަށް ތާއީދުކޮށް ދިނުމަށް އެދިފައެވެ.
ދައުލަތުގެ ވާހަކަތަކާ ގުޅިގެން ނާޒިމްގެ ފަރާތުން މިއަދު ޖަވާބުދާރީވާން މަސައްކަތްކުރި ނަމަވެސް ފަނޑިޔާރުންގެ ވަގުތުތައް ހުރިގޮތުން ފަނޑިޔާރުންގެ ބެންޗުން ނިންމީ ނާޒިމްގެ ފަރާތުން ވާހަކަ ދެއްކުން މާދަމާ އޮންނަ 3 ވަނަ އަޑުއެހުމުގައި ކުރިއަށް ގެންދިއުމަށެވެ.
ނާޒިމްގެ ފަރާތުން ހުށަހެޅި އިސްތިއުނާފް މައްސަލަ ބަލާ ހައި ކޯޓުގެ ފަސް ފަނޑިޔާރުންގެ ބެންޗްގެ ރިޔާސަތު ބަލަހައްޓަވަނީ ފަނޑިޔާރު އަބްދުލްޣަނީ އެވެ. ފަނޑިޔާރުންގެ ބެންޗުގައި ދެން ތިއްބަވަނީ ފަނޑިޔާރު އަބްދުﷲ ހަމީދާއި ފަނޑިޔާރު ޝުއައިބު ހުސައިން ޒަކަރިއްޔާ އާއި ފަނޑިޔާރު އަބްދުއްރައޫފް އިބްރާހިމްގެ އިތުރުން ފަނޑިޔާރު އައްބާސް ޝަރީފެވެ.
ކުރީގެ ޑިފެންސް މިނިސްޓަރ ކާނަލް ނާޒިމްގެ މައްޗަށް ހަނގުރާމަވެރި ހަތިޔާރު އެތެރެކުރުމުގެ ދައުވާ ސާބިތުވާކަމަށް ނިންމައި 11 އަހަރަށް ޖަލަށްލާން ކްރިިމިނަލް ކޯޓުން ހުކުމްކޮށްފައިވާއިރު ނާޒިމް ވަނީ އޭނާގެ މައްޗަށް އިއްވި ހުކުމަކީ ބަޔަކު ރާވައިގެން ކުރި ކަމެއް ކަމަށް ތުހުމަތު ކުރައްވާފައެވެ.