ފިތުުރު ޒަކާތް ބަލައި ގަންނަން ފަށައިފި

އައްޑޫ ސިޓީގެ އަވަށްތަކުން ފިތުރު ޒަކާތް ބަަލައި ގަންނަން ފަށައިފި އެވެ.

އިއްޔެ އިން ފަށައިގެން ފިތުރު ޒަކާތް ބަލައި ގަންނަން ފަށާފައިވާއިރު އަންނަ މަހުގެ 13 ވަނަ ދުވަހާ ހަމައަށް ޒަކާތް ބަލައިގަތުން ކުރިއަށްދާނެ ކަމަށް އައްޑޫ ސިޓީ ކައުންސިލުން މައުލޫމާތު ދެއްވައެވެ.

ކައުންސިލްގެ އޮފިޝަލަކު ވިދާޅުވިގޮތުގައި އަވަށު އޮފީސްތަކުން ފިތުރު ޒަކާތް ބަލައި ގަންނާނީ ބަންދު ދުވަސް ފިޔަވައި އެހެން ދުވަސްތަކުގެ ހެނދުނު 10:30 އިން މެންދުރު ފަހު 1:00 އަށް ކަމަށެވެ.

އިސްލާމިކް މިނިސްޓްރީން ބުނެފައިވާގޮތުގައި ޒަކާތުގެ ގޮތުގައި މި އަހަރު ދައްކަން ޖެހެނީ ބާސްމަތީ ހަނޑުލުން ނަމަ ބޮލަކަށް 75ރ. އަދި ތައިލެންޑު ހަނޑުލުން ނަމަ ބޮލަކަށް 50ރ. އެވެ. އާދައިގެ ހަނޑުލުން ޒަކާތުގެ ގޮތުގައި ދައްކަން ޖެހޭނީ ބޮލަކަށް 12ރ. އެވެ.

ޒަކާތް ދައްކަން ޖެހެނީ އަހަރު ތެރޭގައި އާއްމުކޮށް އެ މީހަކު ނުވަތަ އެ ބަޔަކު ކެއުމަށް ބޭނުންކުރި ހަނޑުލުގެ ބާވަތުން 2.4 ކިލޯ ނުވަތަ އެ އަދަދަށް ވާ ފައިސާ އެވެ. ޒަކާތް ބަލައިގަންނަން ހަމަޖެހިފައި ވަނީ 2.4 ކިލޯގެ އަދަދަށްވާ ފައިސާ އިންނެވެ.

އިސްލާމިކް މިނިސްޓްރީން ބުނެފައިވާ ގޮތުގައި އަތޮޅުތަކުގެ ކައުންސިލްތަކުގެ އިދާރާތަކުން ޒަކާތް ބަލައިގަންނާނީ 2.4 ކިލޯގެ ހަނޑޫ އެ ރަށަކުން ގަންނަން ލިބޭ އަގަކުންނެވެ.

މި އަަހަރު ވެސް އޮންލައިންކޮށް ޒަކާތް ދެއްކޭނެ އިންތިޒާމް އިސްލާމިކް މިނިސްޓްރީން ވަނީ ހަމަޖައްސައިފަ އެވެ. ބީއެމްއެލް އާއި އިސްލާމިކް ބޭންކް ވެބްސައިޓް އަދި އެސްއެމްއެސްއަކުން ދިރާގު މެދުވެރިކޮށް ވެސް ޒަކާތް ދެއްކޭނެ އެެވެ.