ސަރުކާރުން ސިޔާސީ މުވައްޒަފުންގެ އަދަދު މަދު ކުރަން އިއުލާންކޮށްފައި ވަނިކޮށް ސްޕޯޓްސް މިނިސްޓްރީ އަށް އިތުރު ސިޔާސީ މުވައްޒަފަކު އައްޔަންކޮށްފި އެވެ.
އެގޮތުން އެ މިނިސްޓްރީގެ ޔޫތު އެސޯސިއޭޓްގެ މަގާމަށް މިދިޔަ އަންގާރަ ދުވަހު އައްޔަންކޮށްފައި ވަނީ ޝަހީބު އަހުމަދެވެ.
ސިޔާސީ މަގާމުތަކުގައި ތިބި މީހުންގެ ތެރެއިން 228 މުވައްޒަފަކު ވަކި ކުރަން ނިންމެވިކަން ރައީސް ޑރ. މުހައްމަދު މުއިއްޒު އިއުލާންކުރެއްވީ މި މަހުގެ 15 ގަ އެވެ. އަދި އެގޮތަށް ނިންމެވީ ހަރަދުތައް ކުޑަކުރަން އަޅާ ފިޔަވަޅެއްގެ ގޮތުގައި ކަމަށް ވިދާޅުވެފައިވެ އެވެ.
އެގޮތުން އެ ބަދަލާ އެކު މަހަކު 5.7 މިލިއަން ރުފިޔާ ސަލާމަތް ކުރެވޭނެ ކަމަށް ރައީސް ވިދާޅުވި އެވެ.
ވަކި ކުރަން ނިންމި މުވައްޒަފުންގެ ތެރޭގައި ހިމެނެނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުންގެ އިތުރުން އަދި 69 ޕޮލިޓިކަލް ޑިރެކްޓަރުންނެވެ.