ޔޫރޮޕާ ލީގުގައި ރޭ ފެނަބާޗޭ އާއި މެންޗެސްޓާ ޔުނައިޓެޑް 1-1 އިން އެއްވަރުވި މެޗުގައި، ފެނަބާޗޭގެ ކޯޗު ހޯސޭ މޮރީނިއޯ އަށް ރަތް ކާޑެއް ދައްކައިފި އެވެ.
ފެނަބާޗޭގެ ދަނޑުގައި ރޭ ކުޅުނު މެޗުގެ 15 ވަނަ މިނެޓްގައި ކްރިސްޓިއަން އެރިކްސަން ވަނީ ޔުނައިޓެޑަށް ލީޑު ނަގައިދީފަ އެވެ. ޒާކްޒީ ދިން ޕާހަކުން އެރިކްސަން މި ގޯލު ކާމިޔާބު ކުރީ އޭރިއާ ތެރޭ ހުރެ ފޮނުވާލި ބާރު ހަމަލާއަކުންނެވެ.
ފުރަތަމަ ހާފް ނިމުމުގެ ކުރިން ފެނަބާޗޭ އަށް ނަތީޖާ އެއްވަރުކޮށްލަން ރަނގަޅު ފުރުސަތުތަކެއް ލިބިފައިވެ އެވެ. ނަމަވެސް ފެނަބާޗޭ އިން ފޮނުވާލި ހަމަލާތައް ދިފާއުކުރުމުގައި މި މެޗުގައި މޮޅު ކުޅުމެއް ދެއްކި ޔުނައިޓެޑްގެ ކީޕަރު އަންދްރޭ އޮނާނާގެ ހުޝިޔާރުކަން ވަނީ ފެނިގެން ގޮސްފަ އެވެ.
ފެނަބާޗޭ އިން ދެވަނަ ހާފް ފެށިގެން މާގިނަ އިރުތަކެއް ނުވަނީސް ވަނީ ނަތީޖާ އެއްވަރުކޮށްފަ އެވެ. މެކްސިމިން ނަގައިދިން ހުރަހަކުން ޔުނައިޓެޑްގެ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން މި ގޯލު ފެނަބާޗޭ އަށް ކާމިޔާބުކޮށްދިނީ އެޓީމުގެ މޮރޮކޯ ފޯވާޑް ޔޫސުފް އެން ނެސީރީ އެވެ.
މި މެޗުގައި ފެނަބާޗޭގެ ކޯޗު މޮރީނިއޯ އަށް ރަތްކާޑު ދެއްކީ އެޓީމަށް ޕެނަލްޓީއެއް ދޭން ޖެހޭ ކަމަށް ބުނެ ރެފްރީއާ ޒުވާބު ކުރުމުންނެވެ. މޮރީނިއޯ ވަނީ ކުރިން ޔުނައިޓެޑަށް ވެސް ކޯޗުކަން ކޮށްދީފަ އެވެ.
މިއީ ޔޫރޮޕާ ލީގުގައި ޔުނައިޓެޑުން ކުޅުނު ތިންވަނަ މެޗު ކަމަށްވާއިރު، އެޓީމަށް އަދި މޮޅެއް ހޯދިފައެއް ނުވެ އެވެ. އެޓީމަށް ތިން މެޗުން ލިބިފައިވަނީ ތިން ޕޮއިންޓެވެ.