ވަރަށް ގިނަ އަހަރުތަކެއް ވަންދެން ސޮނީ ޓީވީން ގެނެސްދިން އިންވެސްޓިގޭޓިވް ޑްރާމާ ސިލްސިލާ "ސީއައިޑީ" ގެ ދެވަނަ ސީޒަނެއް ގެނެސްދޭން ނިންމައި އޭގެ ޓީޒާއެއް ވެސް ދައްކާލައިފި އެވެ.
އާ ސީޒަން ޕްރީމިއާކުރާނެ ތާރީހެއް އަދި އިއުލާން ނުކުރި ނަމަވެސް އާ ސީޒަންގެ ރަސްމީ ޕްރޮމޯ އާންމުކުރާނެ އެވެ.
"ސީއައިޑީ 2" އިން ވެސް ކުރީގެ މައިގަނޑު ތިން ކާސްޓުން ފެންނާނެ އެވެ. އެއީ ޝިވާޖީ ސަތަމް އާއި ދަޔަނަންދު ޝެޓީގެ އިތުރުން އަދިތިޔާ ސްރިވަސްތާވް އެވެ. މި ތިން މީހުންނާ އެކު ޖެނުއަރީ 21، 1998 އިން ގެނެސްދެމުން ގެންދިޔަ "ސީއައިޑީ" ނިންމައިލީ އޮކްޓޯބަރު 27، 2018 ގަ އެވެ.
އާންމުންގެ ތެރޭގައި ވަރަށް ބޮޑު މަގުބޫލު ހޯދި މި ސިލްސިލާ އަކީ އެ މުއްދަތުގެ ތެރޭގައި ޖުމްލަ 1،547 އެޕިސޯޑަށް ގެނެސްދިން އެއްޗެކެވެ. "ސީއައިޑީ" ގެ އެޕިސޯޑްގައި މައިގަނޑު ގޮތެއްގައި ބިނާކޮށްފައި ހުންނަނީ މަރުތަކުގެ ހަގީގަތްް ހޯދަން ސީއައިޑީގެ އޮފިސަރުންތަކެއް ކުރާ މަސައްކަތަށެވެ.
ބޮޑު މެދުކެނޑުމަކަށް ފަހު "ސީއައިޑީ" އަލުން ބެލުންތެރިންނާ ބައްދަލުކުރާ އިރު، އާ ސީޒަނަކީ ވެސް ޝައުގުވެރި ގިނަ ހާދިސާތަކެއް ދައްކުވައި ދޭނެ އެއްޗަކަށް ވާނެ ކަމަށް ގިނަ ބަޔަކު އެންމެ އުންމީދުކުރެ އެވެ.