ސިންގަޕޫރްގެ އިމާރާތެއްގެ ތިން ވަނަ ބުރީގެ ބޭރުން އިން ކޮންކްރީޓް ޝީޓެއްގެ މައްޗަށް ނުކުތް ކުޑަ ކުއްޖަކު ސަލާމަތްކުރި މީހެއްގެ އަގުވަޒަންކޮށް އެވޯޑް ދީފި އެވެ.
ތިން އަހަރުގެ ފިރިހެން ކުއްޖާގެ ފުރާނަ ސަލާމަތްކޮށް ދިނީ ސިންގަޕޫރްގައި ލޮރީ ޑްރައިވަރެއްގެ ގޮތުގައި މީގެ 16 އަހަރުން ކުރިން ފެށިގެން މަސައްކަތް ކުރަމުން އަންނަ ބަންގްލަދޭޝްގެ ޒުވާނެއް ކަމަށްވާ ޖާހިރް، 34، އެވެ. އޭނަ ކުއްޖާ ސަލާމަތްކުރުމާ ގުޅިގެން އެކަމުގެ އަގުވަޒަންކޮށް ސިންގަޕޯ ސިވިލް ޑިފެންސް ފޯސް އެސްސީޑީއެފް) އިން އަރުވާފައި ވަނީ ކޮމިއުނިޓީ ލައިފްސޭވާ އެވޯޑެވެ.
ޖާހިރު ކުއްޖާ ސަލާމަތްކުރީ މިދިޔަ އާދީއްތަ ދުވަހު އެވެ. އަދި އޭނަ އިންސާނިއްޔަތަކަށްޓަކައި ދެއްކި ހިތްވަރު ފާހަގަކޮށް އެވޯޑް ދިނީ މިއަދު އެވެ.
ޖާހިރު ބުނި ގޮތުގައި އޭނަ އަށް އެ ކުއްޖާ ފެނުނީ މެންދުރަށް ކާ އެއްޗެހި ގަނެގެން ގެއަށް ދިޔަ މަގުމަތީގައި އިމާރާތެއްގެ ކައިރި އަށް ބަޔަކު އެއްވެގެން އުޅޭ ތަން ފެނިގެން ގޮސް ކަމަށެވެ. އޭރު އެ ކުއްޖާ އިމާރާތުން ވެއްޓިއްޖެ ނަމަ، ސަލާމަތްކުރަން ބަޔަކު ރަޖާގަނޑެއް ދިއްކޮށްލައިގެން ތިބި ކަމަށް ބުންޏެވެ.
ކުއްޖާ ސަލާމަތް ކުރަން އިމާރާތުގެ ތިން ވަނަ ބުރިއަށް އަރައި، އެޕާޓްމަންޓް ހުޅުވަން ބެލި އިރު، އެތަން ހުރީ ތަޅުލައިފަ އެވެ. ދެން އޭނަ ކުއްޖާ ހުރި ހިސާބަށް ދިޔައީ ފުރަތަމަ ބުރިން ބޭރަށް ނުކުމެ، ފުރާނަ އަތްމައްޗަށް ލައިގެން، ކުއްޖާ ހުރި ހިސާބަށް ގޮހެވެ. ޖާހިރު ބުނި ގޮތުގައު ކުއްޖާ ހުރި ކޮންކްރީޓް ޝީޓަކީ އޭނަގެ ފައިތިލަ ވުރެ ތަންކޮޅެއް ފުޅާކޮށް އިން ތަނެކެވެ. ނަމަވެސް އެއްވެސް ޖެހިލުމެއް ނެތި ކުއްޖާ ހުރި ހިސާބަށް ގޮސް، ކުއްޖާ ވަނީ ސަލާމަތްކޮށްފަ އެވެ.