ރާއްޖޭގެ ޓޫރިޒަމަށް ކުރިއަށް އޮތީ އުއްމީދީ އަހަރެއް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
އައްޑޫގެ ޓޫރިޒަމް ބްރޭންޑް ލޯންޗު ކުރަން ކެނަރީފް ރިސޯޓުގައި ރޭ ބޭއްވި ޖަލްސާގައި ވާހަކަ ދައްކަމުން ފައިސަލް ވިދާޅުވީ ރައީސް ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގެންނެވި އިރު ދައުލަތަށް މާލީ ގޮތުން ބޮޑެތި ދަތިތަކެއް އެބަހުރި ކަމަށާއި ނަމަވެސް އުއްމީދަކީ ރައީސް މިހާރު އަޅުއްވަމުން ގެންދަވާ ފިޔަވަޅުތަކާއެކު ކުރިއަށް އޮތް ހަ މަސް ދުވަހުގެ ތެރޭގައި ރަނގަޅު ގޮތްތަކެއް ހޯދި، ޓޫރިޒަމްގެ ތަރައްގީ އަށް ބޭނުންވާ ފައިސާ ވެސް ހަމަޖެހިގެންދިޔުން ކަމަށެވެ.
ކައިރި އެކުވެރި ދައުލަތްތަކާއެކު މިހާރު އޮތް ގުޅުމަށް ބަލާއިރު މި ކަންކަން ކުރެވޭނެ ކަމުގެ ޔަގީންކަން އެބައޮތް ކަމަށާއި ރައީސްގެ އަރިހުގައި ދާދިފަހުން އިންޑިއާ އަށް ކުރި ދަތުރަކީ ކާމިޔާބު ދަތުރެއްކަން ފާހަގަކުރައްވަމުން ފައިސަލް ވަނީ އިންޑިއާ އަކީ ރާއްޖޭގެ ޓޫރިޒަމަށް މުހިއްމު މާކެޓެއް ކަމަށް ވިދާޅުވެފަ އެވެ.
ކުރިއަށް އޮތް 10 ވަރަކަށް އަހަރުތެރޭ އިންޑިއާގެ އިގްތިސާދު ދުނިޔޭގެ ތިންވަނަ އަށް އަރާނެ ކަމަށާއި، އިގްތިސާދީ ގޮތުން އިންޑިއާ އަށް ބޮޑު ފުދުންތެރިކަމެއް އައުމުން އިންޑިއާ މާކެޓުން ބޮޑު ފައިދާއެއް ރާއްޖޭގެ ޓޫރިޒަމަށް ވެސް ނެގޭނެ ކަމަށް ފައިސަލް ވިދާޅުވި އެވެ. އިންޑިއާގެ އެހީގައި ހަނިމަދޫ އެއާޕޯޓު އަންނަ އަހަރު ނިމުމުން އެ ސަރަހައްދަށް ޓޫރިޒަމްގެ ޕްރޮޖެކްޓެއް ގެންނަން މަސައްކަތް ކުރަމުންދާ ކަމަށްވެސް އޭނާ ވިދާޅުވި އެވެ.
މީގެއިތުރުން އިންޑިއާ އާއި ދުބާއީގެ އިތުރުން ޗައިނާގައި ވެސް އިންވެސްޓްމެންޓް ފޯރަމްތަކެއް ބޭއްވިފައިވާ ކަމަށާއި މި ހުރިހާ ކަމަކާއެކު އަންނަ އަހަރު ވެގެންދާނީ ރާއްޖޭގެ ޓޫރިޒަމަށް އުއްމީދީ އަހަރަކަށް ކަމަށް ފައިސަލް ވިދާޅުވި އެވެ.
މިއަހަރުގެ މިހާތަނަށް ރާއްޖެ އަށް 1.6 މިލިއަން ފަތުރުވެރިން ޒިޔާރަތްކޮށްފައިވާއިރު، ރާއްޖޭގެ މި އަހަރުގެ ޓާގެޓަކީ 2.3 މިލިއަން ޓޫރިސްޓުން ގެނައުމެވެ.