ތެލަސީމިއާ ކުދިންގެ ތެރެއިން މި އަހަރު ބޯންމެރޯއަށް ފޮނުވި ކުދިންގެ ތެރެއިން ތިން ކުއްޖަކު ފަރުވާ އެއްކޮށް ފުރިހަމަކޮށްފި އެވެ.
ދައުލަތުގެ މީޑިއާ، ޕީއެސްއެމްގައި މޯލްޑިވިއަން ބްލަޑް ސާވިސަސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ. އަޙުމަދު ޢުމަރު ވިދާޅުވީ ޒަކާތު ފަންޑުގެ ދަށުން ބޯންމެރޯ އަށް މި އަހަރު ފޮނުވަން ނިންމި ހުރިާ ކުދިން ވެސް ރާއްޖެ އިން ބޭފަށް ގޮސްފައިވާ ކަމަށެވެ.
އޭގެ ތެރޭގައި ހިމެނެނީ މި އަހަރުގެ އެކި ދުވަސްވަރު ފޮނުވި 14 ކުއްޖެކެވެ.
ޢުމަރު ވިދާޅުވީ އޭގެ ތެރެއިން ތިން ކުއްޖަލު ފަރުވާ މުޅިން ފުރިހަމަކޮށްފައިވާ އިރު، ދެ ކުއްޖަކު ތެލަސީމިއާއިން ފަސޭހަވެ ދެ މިހާރު ރާއްޖެ ވެސް އައިސްފައިވާ ކަމަށެވެ. އަދި އިތުރު ކުއްޖަކު ވެސް ފަރުވާ ފުރިހަމަކޮށް، ކުރިއަށް އޮތް ދެ ހަފާތުތާގެ ތެރޭގައި އަންނާނެ ކަމަށް ވިދާޅުވި އެވެ.
ބޯންމެރޯ ހެދުމަށް މި އަހަރު ފޮނުވި ކުދިންގެ ތެރެއިން އެއް ކުއްޖަކު ނިޔާވެފައިވެ އެވެ.
އުމަރު ވިދާޅުވީ މިހާރު ފަރުވާގައި ތިބި 10 ކުދިން ބޯންމެރޯ އޮޕަރޭޝަނަށް ފަހު އިތުރު ފަރުވާ ފުރިހަމަކުރަމުން އަންނަ ކަމަށެވެ.
"އެ ހުރިހާ ކުދިން ވެސް ފަރުވާ މުޅިން ފުރިހަމަކޮށް ކުރިއަށް އޮތް ނޮވެމްބަރު، ޑިސެމްބަރު މަސްތެރޭ ރާއްޖެ އަންނާނެ." އޭނަ ވިދާޅުވި އެވެ.
ބޯންމެރޯ އަށް ހަދަން ހިލޭ ފަރުވާ އަށް ފޮނުވަނީ ޒަކާތު ފަންޑުގެ ދަށުންނެވެ. އެގޮތުން މި ސަރުކާރުން ވަނީ މި ދައުރުގެ ތެރޭގައި ކޮންމެ އަހަރަކު ވެސް 10 ކުއްޖަކު ފަރުވާ އަށް ފޮނުވަން ނިންމައިފަ އެވެ.
މިދިޔަ ހަފުތާގައު ހެލްތު މިނިސްޓަރު އަބްދުﷲ ނާޒިމު ވިދާޅުވީ އަންނަ އަހަރު ފަރުވާ އަށް ފޮނުވަން ނިންމާ ކުދިންގެ ސްކްރީނިން މިހާރު ކުރިއަށްދާ ކަމަށެވެ.
ރާއްޖޭގެ ތެލަސީމިއާ ދަފުތަރުގައި 959 މީހުން ރެޖިސްޓަރކޮށްފައިވާ އިރު، މިހާރު ދުނިޔޭގައި ތިބީ އޭގެ ތެރެއިން 666 މީހުންނެވެ.