އައްޑޫ ވަކި މަންޒިލެއްގެ ގޮތުގައި ޕްރޮމޯޓްކުރަން ހެދި ބްރޭންޑް ރޭ ލޯންޗްކޮށްފި އެވެ.
"އައްޑޫ؛ ބިޔޯންޑް ދި އީކްއޭޓާ" ގެ ނަމުގައި އުފެއްދި މި ބްރޭންޑް ލޯންޗްކުރީ އެކަމަށްޓަކައި ކެނަރީފް ރިސޯޓްގައި ބޭއްވި ކުލަގަދަ ހަފުލާއެއްގަ އެވެ. އެގޮތުން ބްރޭންޑްގެ ނަމާއި ލޯގޯ ތައާރަފުކޮށް ދިނުމާއި މިއާ ގުޅޭ ވީޑިއޯ ތައާރަފުކޮށް ދެއްވީ ޓޫރިޒަމް މިނިސްޓަރި އިބްރހިމް ފައިސާއި އައްޑޫ މޭޔަރު އަލީ ނިޒާރުގެ އިތުރުން ރާއްޖޭގައި ހުންނަވާ އިންޑިއާގެ ޑެޕިއުޓީ ހައި ކޮމިޝަނަރު ކުމާރް ގޯރަވް އެވެ.
އައްޑޫގެ ޓޫރިޒަމް ބްރޭންޑްގެ މަސައްކަތްކޮށްފައި ވަނީ ކްރިއޭޓިވް ކްރޫއާ ހަވާލުކޮށްގެންނެވެ. އެ ކުންފުނިން އެ މަސައްކަތަށް ކުރިމަތިލީ އެންކްރިއާ ޕްރައިވެޓް ލިމިޓެޑާ ޕާޓްނަޝިލް ހަދައިގެންނެވެ. އަދި އައްޑޫ ސިޓީ ކައުންސިލުން މަސައްކަތް ހަވާލުކުރީ މި އަހަރުގެ ޖުލައި މަހުގެ 28 ގަ އެވެ.
އެންކްރިއާ އިން ރޭ "އައްޑޫ؛ ބިޔޯންޑް ދި އީކްއޭޓާ" އާ ގުޅޭ ގޮތުން ހުށަހެޅި ޕްރެޒެންޓޭޝަންގައި ބުނީ ބްރޭންޑް ވުޖޫދުކުރީ "އައްޑޫ" ގެ ނަމުގެ އަސްލާއި ސާދާކަމާ ގުޅުވައި އައްޑޫގެ ހާއްސަ ސިފަތަކާއި އައްޑޫގެ ހިތްގައިމުކަން ދައްކުވައިދޭ ކުލަތައް ވެސް ރަމްޒުވާ ގޮތަށް ކަމަށެވެ.
އެހެންވެ މި ބްރޭންޑަކީ ވަރަށް އައްޑޫވަންތަ ބްރޭންޑަކަށް ވާނެ ކަމަށް ބުންޏެވެ.
"އައްޑޫ؛ ބިޔޯންޑް ދި އީކްއޭޓާ" ގެ މައިގަނޑު ބޭނުމަކީ އައްޑޫގެ ޓޫރިޒަމް ރާއްޖެ އިން ރާއްޖެ އިން ބޭރުގައި ޕްރޮމޯޓްކޮށް، އެ ދާއިރާ އައްޑޫގައި ފުޅާކޮށް، ކުރިއެރުވުމެވެ.