ވެރިކަންކުރާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ)އަށް މެންބަރުން އިތުރު ކުރުމުގެ ހަރަކާތެއް ފަށައިފި އެވެ.
އެގޮތުން މާލެއާއި އައްޑޫސިޓީގެ އިތުރުން ރާއްޖޭގެ އެކި ކަންކޮޅުތަކުގައި މިއަދު އަންނަނީ ޕީއެންސީއަށް މެންބަރުން އިތުރު ކުރުމުގެ ހަރަކާތްތައް ކުރިއަށް ގެންދަމުންނެވެ.
ޕީއެންސީއަށް މެންބަރުން ވެއްދުމަށް މިއަދު މާލޭގައި ބޮޑު ހަރަކާތެއް ކުރިއަށްގެންދާއިރު މި ހަރަކާތުގައި ޕީއެންސީގެ ލީޑާޝިޕްގައި ހިމެނޭ ފަރާތްތަކުންނާއި ސަރުކާރުގެ އކި މަގާމުތަކުގައި ތިބި ފަރާތްތަކުން ބައިވެރިވެ އެވެ.
މިއަދުގެ ހަރަކާތް ފެށުމުގެ ގޮތުން މީޑިއާތަކަށް މައުލޫމާތު ދެއްވަމުން ރައްޔިތުންގެ މަޖިލީހުގެ މެޖޯރިޓީ ލީޑަރު އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ ވޭތުވެދިޔަ ދެ މަސް ތެރޭގައި ޕީއެންސީއަށް 65،000 އަށް ވުރެން ގިނަ މެންބަރުން ވެއްދިފައިވާ ކަމަށެވެ.
މީގެއިތުރުން އަންނަ މަސް ތެރޭގައި ޕީއެންސީގެ މެންބަރުންގެ އަދަދު 75،000 އަށް އަރާނެ ކަމަށްވެސް ފަލާހު ވިދާޅުވި އެވެ.
އިލެކްޝަންސް ކޮމިޝަންގެ ވެބްސައިޓުން ދައްކާގޮތުން ޕީއެންސީގައި މިވަގުތު ތިބީ 28،983 މެންބަރުންނެވެ.