ޝަންގްރިއްލާ ވިލިނގިލި ރިސޯޓް އެންޑް ސްޕާގައި އަމިއްލަ ފަރާތަކުން ހިންގާ ރަން ފިހާރައެއް ފަޅާލި މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައިވާ އެ ރިސޯޓުގެ މުވައްޒަފުންގެ އާއިލާތަކާއި ގުޅައި "ނުތަނަވަސްކަން ނައްތާލުމަށް" ވާހަކަ ދެއްކުމަށް ބޭނުންވާކަން ހާމަކޮށްފިއެވެ.
ރަންފިހާރަ ފަޅާލި ކަމުގެ ތުހުމަތަށް ހައްޔަރުކޮށްފައިވާ މުވައްޒަފެއްގެ އާއިލާގެ މެންބަރަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި މިމަހުގެ 18 ވަނަ ދުވަހު ކުރިން އައްޑޫގެ އަތޮޅުވެރިކަން ކުރި ސައުދު އަބްދުﷲ ގުޅައި މެނޭޖްމެންޓުގެ ފަރާތުން ވާހަކަ ދެއްކުމަށް ބޭނުންވާ ކަމަށް ބުނެފައިވާ ކަމަށެވެ.
"ސައުދު އަބްދުﷲ ގުޅާފައި ބުނީ ތިމަންނަ މިގުޅީ މެނޭޖްމެންޓުގެ ފަރާތުން ދެފަރާތުގެ މެދުގައި އުފެދިފައިވާ ނުތަނަވަސްކަން ނައްތާލުމަށް ވާހަކަ ދެއްކުމަށޭ. ތިމަންނަ އާއި އެކު މެނޭޖްމެންޓް ބޭފުޅުން މިވަގުތު ވެސް އެބަތިބި ކަމަށް. އެހެން ނަމަވެސް ޝަންގްރިއްލާގެ މެނޭޖްމަންޓާއި އެ ވައްކަމުގެ މައްސަލައިގައި ވާހަކަ ދައްކަން ބޭނުން ނުވާކަމަށް ބުނެ ވާހަކަ ދެއްކުމަށް ވާނީ ދެކޮޅު ހަދާފައި، "، ވައްކަމުގެ މައްސަލައިގައި ހައްޔަރުކޮށްފައި ހުރި މުވައްޒަފެއްގެ އާއިލާގެ މެންބަރަކު ބުންޏެވެ.
މައުލޫމާތު ލިބިފައިވާ ގޮތުގައި ޝަންގްރިއްލާ ރިސޯޓުން ވައްކަމުގެ މައްސަލައިގައި ހައްޔަރު ކުރި ހުރިހާ މުވައްޒަފުންގެ އާއިލާތަކުން ވެސް ވަނީ އެ މައްސަލައިގައި މެނޭޖްމަންޓާއި ވާހަކަ ދެއްކުމަށް ދެކޮޅު ހަދާފައެވެ.
ޝަންގްރިއްލާގެ ވިލިނގިލ ރިސޯޓުގައި މަސައްކަތްކުރާ މުވައްޒަފުން ބުނާގޮތުގައި ރަންފިހާރަ ފަޅާލި ކަމުގެ ތުހުމަތަށް ފުލުހުން ހައްޔަރުކޮށްފައިވާ އެންމެންނަކީ ސީދާ ރިސޯޓުން 'ތުހުމަތު ކުރެވޭ' ކަމަށް ބުނެގެން ހައްޔަރުކޮށްފައިވާ ބައެއް ކަމަށެވެ. ނަމަވެސް ޝަންގްރިއްލާ ރިސޯޓުގެ މެނޭޖްމެންޓުން މިކަމަށް ދެކޮޅު ހަދައެވެ.
ޝަންގްރިއްލާގެ މެނޭޖްމަންޓުން ބުނީ އެއްވެސް މުވައްޒަފަކު ހައްޔަރު ކުރަން ފުލުހުން ގާތު ބުނެފައި ނުވާނެ ކަމަށާއި، ފުލުހުން ކުރިއަށްގެންދާ ތަހްގީގަށް މެނޭޖްމަންޓުގެ އެއްވެސް ދައުރެއް ނެތް ކަމަށެވެ.
ރަންފިހާރަ ފަޅާލި މައްސަލައާއި ގުޅިގެން ރިސޯޓުގައި މަސައްކަތް ކުރާ އެއްވެސް ބިދޭސީ މުވައްޒަފަކާއި ތަހުގީގުގައި ސުވާލުކޮށްފައި ނުވާކަން ފާހަގަކޮށްލެވެއެވެ.
ރިސޯޓުގެ ގިނަ މުވައްޒަފުން ތުހުމަތު ކުރާ ގޮތުގައި، ރަންފިހާރަ ފަޅާލި ހާދިސާއަކީ ރިސޯޓްގެ މެނޭޖްމަންޓުން ރާވައިގެން ކުޅެފައިވާ ޑްރާމާއެކެވެ. އަދި މިކަމުގެ އަޑީގައިވަނީ ޝަންގްރިއްލާ ރިސޯޓުގެ ހޮޓެލް މެނޭޖަރާއި އޭނާގެ އަންހެނުންނެވެ. އެދެ މީހުން ވަނީ އިއްޔެ ރިސޯޓުން ފުރާފައެވެ.